चाळीसगाव (प्रतिनिधी) – १५ व्या वित्त आयोगांतर्गत कामाचे बिल मंजूर करून देण्यासाठी ७ हजार रुपयांच्या लाचेची मागणी करून ती स्वीकारताना जिल्हा परिषद बांधकाम उपविभाग, चाळीसगाव येथील दोन अधिकाऱ्यांना धुळे लाचलुचपत प्रतिबंधक विभागाच्या पथकाने रंगेहात पकडले. एसीबीच्या कारवाईत यथार्थ निनावे (उपविभागीय अभियंता) व कुलदीप गमे (स्थापत्य अभियांत्रिकी सहाय्यक) यांना ७ हजार रुपयांची लाच स्वीकारताना अटक करण्यात आली.
तक्रारदाराचे १५ व्या वित्त आयोगांतर्गत झालेल्या कामाचे बिल मंजूर करण्यासाठी संबंधित अधिकाऱ्यांनी पैशांची मागणी केल्याची तक्रार धुळे एसीबीकडे करण्यात आली होती. तक्रारीची पडताळणी केल्यानंतर एसीबीने सापळा रचला. त्यामध्ये दोन्ही अधिकाऱ्यांना ७हजार रुपयांची लाच स्वीकारताना रंगेहात पकडण्यात आले. या कारवाईमुळे जिल्हा परिषद बांधकाम विभागात एकच खळबळ उडाली असून संबंधितांविरुद्ध गुन्हा दाखल करण्याची प्रक्रिया सुरू असल्याची माहिती मिळाली. मात्र उशिरा पर्यंत पोलीस स्टेशनला गुन्हा नोंद करण्याची प्रक्रिया सुरू होती धुळे लाचलुचपत प्रतिबंधक विभागाने ही कारवाई केली असून पुढील तपास सुरू आहे.
