खोपोली (वृत्तसंस्था) मुंबई-पुणे एक्सप्रेस-वेवर भीषण अपघात झालाय. सहा गाड्यांची एकमेकांना जोरदार धडक झाल्याने हा अपघात झाला. या अपघातात तीन जणांचा दुर्दैवी अंत झाला आहे.
खोपोली येथे झालेल्या या भीषण अपघातामध्ये एका कारचा दोन मोठ्या वाहनांमध्ये चक्काचूर झाला आहे. सोमवारी सकाळी सहा वाजण्याच्या सुमारास हा अपघात झाला. मुंबईकडे येणाऱ्या कोंबड्यावाहू टेम्पोची बसला धडक बसली आणि यानंतर मागची वाहनंही एकमेकांवर आदळली. सदर अपघातानंतर लगेचच बचाव पथक घटनास्थळी दाखल झालं आणि अपघातग्रस्तांपर्यंत मदत पोहोचवली. यानंतर जखमींना नजीकच्या रुग्णालयात दाखल करण्यात आलं. मृतांमध्ये कोंबड्यावाहू टेम्पोतील एक व्यक्ती आणि कारमधील व्यक्तीचाही समावेश आहे. दरम्यान, काही काळासाठी या मार्गावरील विस्कळीत झालेली वाहतूक कालांतरानं पूर्वत करण्यात आली आहे.
