जळगाव (प्रतिनिधी) – कारागृहातून जामीनावर सुटताच दुसरस्या दिवशी असोदा रेल्वे पुलाखाली गावठी कट्टा घेवून दहशत माजविणाऱ्या विक्की उर्फ छोटा माया गणेश शिंदे (वय २२, मूळ रा. चौगुले प्लॉट, ह.मु. कुसुंबा, ता. जळगाव) याच्यासह तलवार घेऊन फिरणाऱ्या अल्पवयीन मुलावर शनिपेठ पोलिसांनी कारवाई करीत शस्त्र जप्त केले. ही कारवाई दि. १४ जून रोजी करण्यात आली. या प्रकरणी या दोघांसह शस्त्र विक्री करणारा ज्ञानेश्वर उर्फ नन्या हडकर/काळनोर (उर्फ हटकर उर्फ गवळी) रा. तांबापुरा याच्याविरुद्ध शनिपेठ पोलिस ठाण्यात गुन्हा दाखल करण्यात येऊन अटक करण्यात आले.
शहरातील आसोदा रोड परिसरात विक्की शिंदे व एक अल्पवयीन मुलगा पिस्तूल तसेच तलवार घेऊन फिरत असल्याची माहिती शनिपेठ पोलिस ठाण्याचे प्रभारी सपोनि साजिद मन्सुरी यांना मिळाली. त्यानुसार त्यांच्यासह पोकॉ. पराग दुसाने व अमोल वंजारी हे आसोदा रेल्वेपुलाखाली पोहचले. त्यांना पाहून दोघांनी पळ काढला, मात्र पथकाने पाठलाग करून त्यांच्या मुसक्या आवळल्या. त्या वेळी विक्की शिंदे याच्याकडे गावठी पिस्तूल व अल्पवयीन मुलाकडे तलवार आढळून आली. दरम्यान पोलिसांनी दोघ संशयितांना अटक केली असून त्यांच्याजवळून घातक शस्त्र जप्त केले.
१० हजारांचा खरेदी केला गावठी कट्टा
पोलिसांनी ताब्यात घेतलेल्या दोघ संशयितांची कसून चौकशी केली. यावेळी त्याने हे शस्त्र त्यांचा मित्र ज्ञानेश्वर हडकर याच्याकडून घेतल्याचे दोघांनी पोलिसांना सांगितले. यात पिस्तूल १० हजार तर तलवार दोन हजार रुपयांमध्ये घेतल्याचे सांगण्यात आले असून ते जप्त करण्यात आल आहे.
संशयितांना पोलीस कोठडी
या प्रकरणी पोलीस अंमलदार पराग दुसाने यांनी दिलेल्या फिर्यादीवरुन शनिपेठ पोलिस ठाण्यात विक्की शिंदे, ज्ञानेश्वर हडकर व १७वर्षीय अल्पवयीन मुलाविरुद्ध गुन्हा दाखल करण्यात येऊन अटक करण्यात आले. त्यांना सोमवार दि. १५ जून रोजी न्यायालयात हजर करण्यात आले, न्यायालयाने त्या दोघांना पोलीस कोठडी सुनावली. पुढील तपास तपास सहायक निरीक्षक साजिद मन्सुरी करीत आहेत.
