अमरावती (वृत्तसंस्था) दोन अल्पवयीन मुलांना (Minor Boys) अश्लील कृत्य करायला लावून त्यांचा व्हिडीओ शूट (Obscene Video Shoot) केल्याचा धक्कादायक प्रकार उघडकीस आला आहे. इतक्यावरच न थांबता आरोपींना दोघांचा व्हिडीओ व्हायरल केला आहे. ‘चाईल्ड पोर्नोग्राफी’मध्ये मोडणाऱ्या या प्रकरणी तिवसा पोलिसांनी १९, २० व २२ वर्षीय अशा तीन तरुणांविरूद्ध गुन्हा दाखल करण्यात आला असून तिघांना अटक करण्यात आली आहे.
१२ फेब्रुवारी रोजी सायंकाळी ५ च्या सुमारास आपल्या अल्पवयीन मुलासह दुसऱ्या अल्पवयीन मुलाचा अश्लील व्हिडिओ मोबाईलवर व्हायरल झाल्याचे संबंधित पालकाला समजले. त्या कृत्यामुळे त्या दोन्ही मुलांमध्ये भीती निर्माण झाली आहे. त्यामुळे असे अश्लील कृत्य करणाऱ्यांविरूद्ध कायदेशीर कार्यवाही करण्यात यावी, अशी तक्रार त्या पालकाने १२ फेब्रुवारी रोजी रात्री ११. १३ च्या सुमारास नोंदविली. तत्पूर्वी आपल्या पाल्याला विश्वासात घेऊन त्यांनी एकंदरित घटनाक्रम जाणून घेतला.
तक्रारीनुसार, साधारणत, आठ दिवसांपूर्वी तीनही संशयितांनी खेळत असलेल्या त्या मुलांना बोलावून नवीन व्हिडिओ बनविण्याची बतावणी केली. तथा अश्लील कृत्य करण्यास सांगून ते मोबाईलमध्ये चित्रित केले. ते तिघेही संशयित तेवढ्यावरच न थांबता त्यांनी तो अश्लील व्हिडिओ बऱ्याच लोकांच्या मोबाईलवर पाठवून व्हायरल केला. या प्रकारामुळे ते दोघेही अल्पवयीन मुले भयग्रस्त झाली आहेत. याबाबत तिवसा पोलिसांनी गुन्हा नोंदवून संशयितांचा तपास चालविला आहे.
