मुक्ताईनगर (प्रतिनिधी) सूरत येथील आपल्या घरून पळून आलेल्या चार अल्पवयीन मुलींना मुक्ताईनगर पोलिसांनी सुखरूपपणे थांबवले, त्यानंतर त्यांच्या पालकांना पाचारण करण्यात आले आहे. तसेच या मुलींना सूरत पोलिसांच्या ताब्यात दिले आहे.
सूरत येथील रहिवासी असलेल्या चार अल्पवयीन मुली आपल्या घरून निघून आल्या होत्या. या मुली मुक्ताईनगरातील जय भवानी मेस येथे काल रात्री पावणेनऊ वाजेच्या सुमारास भोजनासाठी आल्या. याप्रसंगी मेस चालक आकाश लिधोरे यांना संशय आल्याने त्यांनी या संदर्भात मुक्ताईनगरचे पोलीस निरीक्षक नागेश मोहिते यांना माहिती दिली. त्यांनी तत्काळ या ठिकाणी पोलीस कर्मचाऱ्यांना पाठवले. पोलिसांनी या मुलींची चौकशी केली असता त्यांनी घरून पळून आल्याचे सांगितले. या मुली सुरतमधील पांडसरा परिसरातील रहिवासी आहे. पालकांसोबतच्या वादातून घर सोडल्याचे त्यांनी सांगितले. त्यानंतर मुक्ताईनगर पोलिसांनी तातडीने तेथील पोलीस ठाण्याच्या माध्यमातून या मुलीच्या पालकांशी संपर्क साधून त्यांना ही माहिती दिली. तेथील पोलीस पथकाच्या ताब्यात या मुलींना देण्यात आले आहे.
या मुलींची महिला पोलीस कर्मचारी प्रज्ञा इंगळे यांनी काळजी घेतली. ही कारवाई जिल्हा पोलीस अधीक्षक एम. महेश्वर रेड्डी, अप्पर पोलीस अधीक्षक अशोक नखाते, डीवायएसपी राजकुमार शिंदे व पो.नि. नागेश मोहिते यांच्या मार्गदर्शनात उपनिरीक्षक खनके, हवालदार लीलाधर भोई, प्रदीप इंगळे, सुरेश पाटील, सागर सावे, डिगंबर कोळी, चेतन महाजन, निखिल नारखेडे आणि महिला पोलीस प्रज्ञा इंगळे यांच्या पथकाने केली.
