नाशिक (वृत्तसंस्था) उत्तमनगर येथील सर्वेश्वर महादेव चौकातील एका घरात गॅस गळतीमुळे स्फोट होऊन तिघे जखमी झाल्याची घटना घडली. स्फोट इतका भीषण होता की, शेजारील घराच्या खिडकी व वाहनांच्याही काचा फुटल्या आहेत. जखमींपैकी एकाची प्रकृती चिंताजनक असल्याचे कळते.
सर्वेश्वर महादेव चौकात भाडेतत्त्वावरील एका दुमजली घरामध्ये तुषार पंडित जगताप कुटुंबीयांसह राहतात. मंगळवारी (दि. २६) रात्री घरातील सदस्याकडून गॅसचे बटन सुरूच राहिले होते. त्यामुळे बुधवारी (दि. २७) पहाटे ५.३० च्या सुमारास घरातील एक महिला गॅस पेटविण्यास गेली असता रात्रभर घरात पसरलेल्या गॅसचा अचानक भडका होऊन मोठा स्फोट झाला. यावेळी घरातील कॉस्मेटिक साहित्य आणि बॉडी स्प्रेच्या बाटल्यांचादेखील स्फोट झाल्याने घरात आग भडकली.
या अग्नितांडवात तुषार जगताप (वय ३५) हे गंभीररित्या भाजले. तर त्यांचे सासरे बाळकृष्ण तुळशीराम सुतार (वय ६५) व आई शोभा पंडित जगताप (वय ६०) यांनाही आगीने घेरल्याने हे दोघेही भाजून जखमी झाले. स्फोटाचा आवाज व आरडाओरड झाल्याने नागरिक जमा झाले. त्यांनी तातडीने बेशुद्धावस्थेतील तुषार यांच्यासह अन्य दोघा जखमींना खासगी रुग्णालयात दाखल केले. यापैकी तुषार जगताप यांची प्रकृती चिंताजनक असल्याचे डॉक्टरांनी सांगितले. स्फोट इतका भीषण होता की घटनास्थळापासून वीस ते २५ फुटावरील चारचाकी वाहनाच्या व शेजारील घराच्या खिडक्यांच्या काचांना तडे गेले.
तुषार हे एका खासगी कंपनीत नोकरीला असून, त्यांच्या आजारी असलेल्या पत्नीला बघण्यासाठी त्यांचे सासू-सासरे गुजरातहून मंगळवारी (दि. २६) सकाळी आले होते. तर तुषार सांगितले. यांची आई देखील नुकतीच पुण्याहून आलेली होती. सासूबाई रात्री पत्नीजवळ रुग्णालयात थांबल्या होत्या. त्यामुळे रात्री घरी तुषार, त्यांची आई व सासरे असे तिघेच जण होते. याप्रकरणी अंबड पोलीस ठाण्यात नोंद करण्यात आली आहे.
