धरणगाव (प्रतिनिधी) शहरातील मराठे गल्ली भागात मागील काही दिवसापासून एका ठिकाणी फुटलेली पाईप लाईन दुरुस्ती अभावी मागील आठ-दिवसापासून मोठ्या प्रमाणात पाण्याची नासाडी होत आहे. तसेच वारंवार सूचना करून देखील पालिका प्रशासन व ठेकेदार दुर्लक्ष करत असल्याचा आरोप भाजपच्या माजी नगरसेविका संगीता गुलाब मराठे यांनी केला आहे.
शहरातील मराठे गल्ली भागातील डॉ. काबरे यांच्या रुग्णालयासमोर मागील आठ-दिवसापासून पाईप लाईन फुटली आहे. त्यामुळे पालिका अधिकारी आणि संबंधित ठेकेदार यांना वारंवार सूचना केली जात आहे. परंतू तकलादू काम केले जात आहे. त्यामुळे पाईप लाईन पुन्हा फुटते. यामुळे भर उन्हाळ्यात हजारो लिटर पाण्याची नासाडी होत आहे. याबाबत पालिका प्रशासन व ठेकेदारला सांगून दुर्लक्ष केले जात आहे. परिसरातील नागरीकांचे यामुळे मोठे हाल होत आहेत. पालिकेने पाणी सोडल्यानंतर पाईप पुन्हा फुटतो. त्यामुळे परिसरातील नागरिकांच्या नळाला पाणी येत नाही. पर्यायी नागरिकांच्या रोषाला आम्हाला सामोरे जावे लागते. पालिकेने या विषयाची तात्काळ दखल न घेतल्यास आम्हाला पालिकेवर मोर्चा काढण्याशिवाय पर्याय राहणार नाही, असा इशाराही माजी नगरसेविका संगीता मराठे यांनी दिला आहे.
