जळगाव (प्रतिनिधी) – चोरटे घराचा कडीकोयंडा तोडत असतांना त्यांना बाजूला चाबी ठेवलेली दिसली. त्यामुळे चोरट्यांनी चाबीने दरवाजा उघडून शाळेत गेलेल्या तृषा चंद्रकांत संन्याशी (वय ३९, रा. कोल्हे हिल्स परिसर) या शिक्षीकेच्या घरात डल्ला मारला. याठिकाणाहून त्यांनी २० हजार रुपयांच्या रोकडसह सोन्याचे दागिने असा एकूण १ लाख ३३ हजार ५०० रुपयांचा ऐवज चोरून नेला. ही घटना २८ मार्च रोजी भरदिवसा कोल्हे हिल्स परिसरात घडली. याप्रकरणी तालुका पोलीस ठाण्यात गुन्हा दाखल करण्यात आला आहे.
शहरातील कोल्हे हिल्स परिसरात तृषा संन्याशी या राहत असून त्या रुस्तमजी स्कूलमध्ये शिक्षिका आहेत. दि. २८ मार्च रोजी सकाळी १० वाजता त्या घराला कुलूप लावून शाळेत गेल्या. त्यानंतर १० ते दुपारी एक वाजेदरम्यान चोरटे शिक्षिका राहत असलेल्या शकुंतला हाईटस या अपार्टमेंटमध्ये शिरले. त्यांना संन्याशी यांचे घर बंद दिसल्यामुळे चोरट्यांनी कडीकोयंडा तोडण्याचा प्रयत्न केला. मात्र त्याच वेळी त्यांना दरवाजाचा बाजूला चावी ठेवलेली दिसली. त्या चाबीद्वारे त्यांनी कुलूप उघडून घरातून रोख २० हजार रुपयांसह १ तोळे सोन्याची चेन, दीड तोळा, अडीच ग्रॅम व २ ग्रॅम असे सोन्याचे तीन मंगळसूत्र, ४ ग्रॅमचे रिंग, ४ ग्रॅमचे सोन्याचे शिक्के, १ ग्रॅम सोन्याचा तुकडा असा एकूण १ लाख ३३ हजार ५०० रुपये किमतीचा ऐवज चोरून नेला.
घरी आल्यानंतर घटना उघडकीस
शिक्षिका तृषा संन्याशी या घरी आल्यानंतर ही घटना उघडकीस आली. शिक्षकेने या घटनेविषयी तालुका पोलिस ठाण्यात फिर्याद दिली. त्यावरून अज्ञात चोरट्यांविरुद्ध गुन्हा दाखल करण्यात आला आहे. तपास उपनिरीक्षक विजय पाटील करीत आहेत.
सुरक्षा असतांनाही चोरट्यांनी मारला डल्ला ज्या अपार्टमेंटमध्ये घरफोडी झाली त्या अपार्टमेंटमध्ये सुरक्षेच्या दृष्टीने सीसीटीव्ही कॅमेऱ्यांसह सुरक्षा रक्षक देखील तैनात केला आहे. तसेच अपार्टमेंटमधील प्रत्येक जण घराला कुलूप लावून घेतो. मात्र घरफोडी घटना घडली त्यावेळी सुरक्षा रक्षक हा बाहेर गेलेला होता तर त्याचवेळी विद्युतपुरवठा खंडीत झाल्यामुळे चोरटे सीसीटीव्हीत कैद झाले नाही. त्यामुळे सुरक्षेची काळजी घेतलेली असतांना देखील चोरट्यांनी संधी साधत ऐवज लंपास केला.
दोन संशयितांना जातांना पाहिले
अपार्टमेंटमध्ये चोरी करणारे चोरटे हे दोन जण असण्याची शक्यता असून त्यात एक जण ४० ते ४५ व दुसरा २० ते २५ वर्षे वयोगटातील आहे. काही जणांनी या दोन संशयितांना जाताना पाहिले होते, अशी माहिती परिसरातील काही जणांनी पोलिसांना दिली. त्यादृष्टीने पोलिसांकडून त्या संशयितांचा शोध घेतला जात आहे.
तालुका पोलीस ठाण्याच्या हद्दीत घरफोडीचे सत्र सुरुच गेल्या महिनाभरात तालुका पोलीस ठाण्याच्या हद्दीत घरफोडीच्या घटना घडत आहे. पोलीसांकडून कोल्हे हिल्ससह वाढीव वस्तीमध्ये नियमीत गस्त घालत नसल्याचे या घरफोडीच्या घटना वाढत असल्याचे परिसरातील नागकिरांनी सांगितले. त्यामुळे या वाढीव वस्त्यांमध्ये पोलिसांची नियमीत गस्त वाढविण्याची मागणी परिसरातील नागरिकांकडून केली जात आहे
