जळगाव (प्रतिनिधी) – उज्जैन येथे दर्शनासाठी गेलेल्या महिलेच्या घरात धाडसी चोरी करुन लाखो रुपयांचा ऐवज लांबविणाऱ्या विशाल मुरलीधर दाभाडे (वय २५), जितेंद्र मुरलीधर दाभाडे (वय २७, रा. रामेश्वर कॉलनी) या दोघा भावंडांना एमआयडीसी पोलिसांनी २४ तासाच्या आत जेरबंद केले. त्यांच्याकडून चोरीस गेलेला ३१ लाख २६ हजार रुपयांचा ऐवज जप्त करण्यात आला आहे.
शहरातील रामेश्वर कॉलनीत राहणाऱ्या संगिता घुगे या कुटुंबियांसह मध्यप्रदेशातील उज्जैन येथे दर्शनासाठी गेलेल्या असतांना त्यांच्या घराचा कडी-कोयंडा तोडून चोरट्यांनी सोने-चांदीच्या दागिन्यांसह रोकड असा एकूण ८ लाख रुपयांचा मुद्देमाल चोरुन नेला होता. दरम्यान, घुगे कुटुंबिय घरी परतल्यानंतर त्यांना घरात चोरी झाल्याचे समजल्यानंतर त्यांनी एमआयडीसी पोलिसात तक्रार दिली. त्यानुसार चोरट्यांविरुद्ध गुन्हा दाखल करण्यात आला होता. या घटनेचे गांभीर्य लक्षात घेत पोलीस अधीक्षक श्रीकांत धिवरे यांनी एमआयडीसी पोलीस ठाण्याचे प्रभारी पोनि बबन आव्हाड यांना गुन्हा उघडकीस आणण्याच्या सूचना दिल्या होत्या. त्यानुसार गुन्हे शोध पथकाकडून संशयितांच्या शोध सुरु होता.
तांत्रिक विश्लेषणाच्या आधारे केले जेरबंद
गुन्हे शोध पथकाने घटनास्थळावरील पुराव्यांसह सीसीटीव्ही व तांत्रिक विश्लेषणाच्या आधारावर याच परिसरात राहणारा पोलिसांच्या रेकॉर्डवरील गुन्हेगार विशाल दाभाडे व त्याचा भाऊ जितेंद्र दाभाडे या दोघांना ताब्यात घेतले. त्यांची कसून चौकशी केल्यानंतर त्यांनी घुगे यांच्या घरातून चोरलेला २०८ ग्रॅम सोने व २८ ग्रॅम चांदी असा एकूण ३१ लाख २६ हजार ८०० रुपयांचा ऐवज काढून दिला असून पोलिसांनी तो हस्तगत केला आहे.
या पथकाची कामगिरी
ही कामगिरी एमआयडीसी पोनि बबन आव्हाड यांच्या नेतृत्वात गुन्हे शोध पथकातील उपनिरीक्षक चंद्रकांत धनके, विजयसिंग पाटील, पोहेकॉ रामकृष्ण पाटील, रमेश चौधरी, किरण चौधरी, पोना प्रदीप चौधरी, रमाकांत साळुंखे, नितीन ठाकूर, राहुल घेटे, गणेश ठाकरे, किरण पाटील, शशिकांत मराठे, ललित नारखेडे, विशाल कोळी, योगेश घुगे व सुभाष साबळे यांच्या पथकाने केली.
चोरी ८ लाखांची मुद्देमाल हस्तगत केला ३१ लाखांचा
चोरट्यांनी संगिता घुगे यांच्या घरातून तब्बल ४५ तोळे सोने आणि लाखो रुपयांची रोकड चोरुन नेल्याची चर्चा पोलीस दलात सुरु होती. मात्र घुगे यांनी दिलेल्या फिर्यादीवरुन त्यांच्या घरातून १४० ग्रॅम सोने आणि दीड लाख रुपयांची रोकड असा एकूण ८ लाख रुपयांचा ऐवज चोरुन नेल्याप्रकरणी तक्रार दिली आहे. मात्र पोलिसांनी केलेल्या चौकशीत चोरट्यांनी ३१ लाख रुपयांचा मुद्देमाल हस्तगत केल्यामुळे अन्य काही गुन्हे उघडकीस येण्याची शक्यता पोलिसांकडून वर्तविली जात आहे.
