जळगाव ( प्रतिनिधी ) – हॉटेलमध्ये जेवण करीत असतांना एकमेकांकडे पाहण्याच्या कारणावरुन वाद झाले. या वादातून विशाल शरद हंसारी (वय ३६, रा. इंदौर, मध्यप्रदेश) यांच्यावर तीन जणांनी धारदार चाकूने वार करीत गंभीर जखमी केले. ही घटना दि. ६ मे रोजी रात्री साडेसहा वाजेच्या सुमारास शिरसोली रस्त्यावरील हॉटेल आमंत्रण येथे घडली. याप्रकरणी एमआयडीसी पोलिसात गुन्हा दाखल करण्यात आला आहे.
मध्यप्रदेशातील इंदौर येथील विशाल शरद हंसारी हे त्यांचा शालक कुणाल राजेश बारसे व राहुल संजय हाडा हे दि. ६ मे रोजी सायंकाळी शिरसोली रोडवरील हॉटेल आमंत्रण येथे जेवणासाठी गेले होते. दुसऱ्या टेबलावर बसलेले तिघ संशयित हे जेवण करीत असलेल्या हंसारी यांच्याकडे एकसारखे पाहत होते. यावेळी त्यांनी संशयितांना तुम्ही तुमचे जेवण करा, आमच्याकडे बघू नका असे बोलले. त्याचा राग आल्याने त्या संशयितांनी तिघांना शिवीगाळ करीत चापटा बुक्क्यांनी मारहाण केली.
उपचारानंतर पोलिसात गुन्हा दाखल
मारहाणीनंतर संशयित तुषार सोनवणे याने कमरलेला खोचलेला चाकू काढून विशाल हंसारी यांच्या पोटावर वार केले. यामध्ये ते गंभीररित्या जखमी झाले असून त्यांना तात्काळ उपचारासाठी रुग्णालयात दाखल केले. उपचारानंतर त्यांनी दि. ६ मे रोजी एमआयडीसी पोलिसात तक्रार दिली. त्यानुसार संशयित तुषार ईश्वर सोनवणे (रा. जोशीवाडा मेहरुण), राज रमेश सोनवणे (रा. शिंदे गल्ली गेंदालाल मिल) व विशाल नामक इसमाविरुद्ध गुन्हा दाखल करण्यात आला आहे.
