जळगाव (प्रतिनिधी) लहान मुलांचे अपहरण करीत असल्याच्या संशयावरुन तरुण हातात तलवार घेवून त्या इसमांचा शोध घेत असतांना त्याने एका धार्मीक स्थळाच्या आवारातील पाण्याने भरलेल्या माठासह प्लास्टीकच्या टाकीची नासधूस केली. ही घटना रविवारी सकाळी ११ वाजेच्या सुमारास वाल्मिक नगरात घडली. त्या संशयित तरुणाला अटक करुन पोलीस ठाण्यात आणल्यानंतर दोन्ही गटातील नागरिकांनी पोलीस ठाण्याबाहेर गर्दी केली होती. त्यामुळे परिसरात – तणावाचे वातावरण निर्माण झाले होते. याप्रकरणी संशयितासह अपहरण करणाऱ्याविरुद्ध गुन्हा दाखल करण्यात आला आहे.
शहरातील वाल्मिक नगर परिसरात राहणाऱ्या अल्पवयीन मुलगा घराबाहेर खेळत असतांना काही संशयीत इसम त्याठिकाणी आले. त्या इसमांकडून त्या मुलाचे अपहरण केले जात असल्याचा संशय परिसरातील नागरिकांना आला. या घटनेची माहिती मिळताच त्या परिसरात राहणारा प्रवीण रमेश कोळी हा त्याठिकाणी आला. त्याने घरातून धारदार तलवार घेवून तो त्या इसमांच्या मागे धावत सुटला. त्यामुळे ते इसम देखील त्या परिसरातून पळून गेले. दरम्यान, ते इसम एका धार्मीक स्थळाच्या दिशेने गेल्याचे समजल्यानंतर प्रवीण कोळी हा तलवार घेवून त्याठिकाणी गेला. त्याने धार्मीक स्थळाच्या आवारात ठेवलेले माठ आणि प्लास्टीकची पाण्याची टाकी तलवारीने फोडून दहशत माजविण्याचा प्रयत्न केला.
तोडफोड करणाऱ्याला पोलिसांनी घेतले ताब्यात
घटनेची माहिती मिळताच शनिपेठ पोलीस ठाण्याचे पोलीस निरीक्षक रंगनाथ धारबळे, पोहेकॉ गिरीश पाटील, गजानन पाटील, अनिल कांबळे यांच्यासह परिसरातील नागरिकांनी घटनास्थळी धाव घेतली. त्यांनी दहशत माजविणाऱ्या संशयीत प्रवीण कोळी याला ताब्यात घेतले.
पोलिसांनी मध्यस्ती करीत लावले हुलकावून
धार्मीक स्थळाच्या आवारात तोडफोड केल्याची माहिती मिळताच परिसरातील नागरिकांनी तात्काळ पोलीस ठाण्याबाहेर गर्दी करु लागले. यावेळी दोन्ही गटातील नागरिक समोरासमोर आल्यामुळे पोलीस ठाण्याच्या बाहेर तणावाचे वातावरण निर्माण झाले होते. यावेळी पोलिसांनी मध्यस्ती करुन त्याठिकाणाहून दोन्ही गटांना हुलकावून लावले.
अपहरण करणाऱ्यासह दहशत माजविणाऱ्याविरुद्ध गुन्हा
घटनेचे गांभीर्य लक्षात घेता उपविभागीय पोलीस अधिकारी संदीप गावित यांनी शनिपेठ पोलीस ठाण्यात धाव घेतली. परिसरातील नागरिकांनी त्यांचे भेट घेत कार्यवाही करण्याची मागणी केली. त्यानुसार अपहरणाचा प्रयत्न केल्याप्रकरणी अज्ञातांविरुद्ध गुन्हा दाखल करण्यात आला असून तर तलवार घेवून तोडफोड करीत दहशत माजवित असलेल्या प्रवीण रमेश कोळी (वय ३०, रा. पिंजारीवाडा, वाल्मिक नगर) याच्याविरुद्ध गुन्हा दाखल करुन त्याला अटक करण्यात आली आहे.
