जळगाव (प्रतिनिधी) शहरातील छत्रपती शिवाजी महाराज क्रीडा संकुलात असलेल्या जलतरण तलावात २२ वर्षीय फळविक्रेत्या तरुणाचा रविवारी सायंकाळी बुडून मृत्यू झाला. सलमान शकील बागवान (वय २४, रा. जोशीपेठ, बागवान वाडा) असे मृत युवकाचे नाव आहे. दरम्यान, मृत्यूची वार्ता कळताच सलमानच्या कुटुंबीयांनी मन हेलावणारा आक्रोश केला होता.
सलमान गेल्या अनेक वर्षांपासून फळ विक्रीचा व्यवसाय करत होता. बागवान वाड्यात आई, वडील शकील बागवान, मोठा भाऊ व तीन बहिणींसोबत तो वास्तव्यास होता. रविवारी फळ विक्रीचा व्यवसाय बंद असल्याने सलमान सायंकाळी ४ वाजेच्या सुमारास मित्रांसोबत जलतरण तलावात पोहायला आला होता. रविवारची सुट्टी असल्याने जलतरण तलावात पोहोणाऱ्यांची संख्या देखील जास्त होती.
मित्रांसोबत पोहत असतानाच खोल भागात पोहचला. पाण्याच्या खोलीचा अंदाज न आल्यामुळे तो बुडाला. सलमान बुडत असल्याचे काही मित्रांच्या लक्षात आले. जलतरण तलावातील सुरक्षा रक्षकांना बोलावून, सलमानला तातडीने जिल्हा रुग्णालयात दाखल करण्यात आले. मात्र, त्याठिकाणी डॉक्टरांनी सलमानला मृत घोषीत केले. दुसरीकडे सलमानला पोहता येत नव्हते आणि ही बाब जीवनरक्षकांना सांगितलेली होती, असा दावा त्याच्यासोबत असणाऱ्या मित्रांनी केला आहे. तर पोहोण्याची वेळ संपल्यानंतर ही घटना घडल्याचा दावा जीवनरक्षकाच्या हवाल्याने जिल्हा क्रीडा अधिकारी करीत आहेत. दरम्यान, सलमानच्या कुटुंबीयांनी त्याचा मृतदेह पाहताच मोठा आक्रोश केला.
