पाचोरा (प्रतिनिधी) ऑनलाईन इंटरव्ह्यू द्या, असे सांगून ऑनलाईन परीक्षेचा पेपर सोडवीत असताना एका २४ वर्षीय तरुणाची ऑनलाईन फसवणूक झाल्याचा प्रकार समोर आला आहे. याप्रकरणी पाचोरा पोलीस ठाण्यात अज्ञात महिलेविरुद्ध गुन्हा दाखल करण्यात आला आहे.
यासंदर्भात सोहन अशोक मोरे (वय २४ रा. शिवाजीनगर पाचोरा) याने दिलेल्या फिर्यादीनुसार, दि. २ मे २०२२ रोजी एका अज्ञात महिलेने तिच्या मोबाईल नं. 8954366463 वरून सोहनच्या मोबाईलवर नोकरीची ऑनलाईन इंटरव्ह्यू द्या, असे सांगून एक लिंक www.indiabix.com पाठविली. त्या लिंकवर सोहनला ऑनलाईन परीक्षा पेपर सोडविण्याचे सांगण्यात आले. त्यानुसार सोहन पेपर सोडवित असताना दुपारी १२.१५ ते दुपारी १.१७ वाजेच्या दरम्यान सोहनच्या बँक खात्यातून १५० रुपये दोनदा व नंतर ८ हजार ३०० रुपये व नंतर ९ हजर रुपये, असे एकूण चार वेळा पैसे काढल्याचे मेसेज आले. तर संपूर्ण प्रकरणात सोहमची एकूण १७ हजार ६०० रुपयात फसवणूक झाली आहे. या प्रकरणी पाचोरा पोलीस ठाण्यात अज्ञात महिलेविरुद्ध गुन्हा दाखल करण्यात आला असून पुढील तपास पोहेकॉ निवृत्ती मोरे हे करीत आहेत.
