जळगाव (प्रतिनिधी) – जुन्या भांडणातून आकाश अजय सोनार (वय २६, रा. लक्ष्मीनगर) यांच्या घरी जाऊन ते न सापडल्याने त्याच्या घरावर दगडफेक करण्यात आली. ही घटना दि. २ ऑगस्ट रोजी शहरातील लक्ष्मीनगरात घडली. या प्रकरणी एमआयडीसी पोलिस ठाण्यात ७ जणांविरुद्ध गुन्हा दाखल करण्यात आला आहे.
शहरातील लक्ष्मी नगर परिसरात आकाश अजय सोनार हे वास्तव्यास आहे. त्यांनी दिलेल्या फिर्यादीवरुन मागील भांडणाच्या कारणावरून बबलू हिरामण धनगर (रा. सम्राट कॉलनी) हा कोयता घेऊन आकाश सोनार यांच्या घरी आला. तसेच अविनाश राठोड (रा. रामेश्वर कॉलनी), गणेश दंडगव्हाळ (रा. छत्रपती संभाजीनगर), जिगर बोंडारे (रा. उमाळा, ता. जळगाव) व इतर तीन अनोळखी इसम आकाश यांच्या घरात घुसले. तेथे त्यांच्या आईकडे आकाश विषयी विचारणा करून ‘आज त्याचा मर्डर करतो’ असे म्हणत शिवीगाळ केली व घरात तरुणाचा शोध घेतला. ते घरात न सापडल्याने बाहेर जाऊन घरावर दगडफेक केली. या प्रकरणी आकाश सोनार यांनी एमआयडीसी पोलिस ठाण्यात दिलेल्या फिर्यादीवरून वरील सात जणांविरुद्ध गुन्हा दाखल करण्यात आला आहे. तपास पोहेकॉ रमेश चौधरी करीत आहेत.
