जळगाव (प्रतिनिधी) चाळीसगाव तालुक्यातील मेहुणबाऱ्याच्या हद्दीत स्थानिक गुन्हे शाखेच्या पथकाने अंदाजे ५० लाखांचा गुटख्याने भरलेला ट्रक शुक्रवारी पकडला. परंतू तेथे गुन्हा दाखल न करता ट्रक जळगाव येथे आणला जात असताना चाळीसगावचे आ. मंगेश चव्हाण यांनी पहाटे ४ वाजेच्या सुमारास पकडून पोलिसांना याबाबत जाब विचारला. तसेच माझी फिर्याद घ्यावी म्हणून आक्रमक भूमिका घेतली.
धुळे येथून चाळीसगाव तालुक्यातील मेहुणबारे येथे शुक्रवारी रात्री साडेआठ वाजता एक गुटख्याने भरलेला ट्रक येणार असल्याची गुप्त माहिती स्थानिक गुन्हे शाखेला मिळाली होती. त्यानुसार मेहूनबारे येथे गुन्हे शाखेच्या पथकाने हा ट्रक अडविला. ट्रकची तपासणी केली असता त्यात अंदाजे ५० लाखांचा गुटखा असल्याचे दिसून आले. परंतू अचानक हा ट्रक स्थानिक पोलीस स्थानकात न नेता जळगावला गुन्हे शाखेच्या कार्यालयात आणण्यासाठी रवाना झाला. याची माहिती आमदार मंगेश चव्हाण यांना मिळताच त्यांनी ट्रकचा पाठलाग सुरु केला. त्यानुसार पहाटे ४ वाजेच्या सुमारास हा ट्रक शिरसोली गावाजवळ एमआयडीसी पोलीस स्टेशनच्या हद्दीतील जैन व्हॅली जवळ थांबविला. त्यानंतर हा ट्रक मेहुणबारेच्या हद्दीत पकडल्यानंतरही तेथे गुन्हा का दाखल करण्यात आला नाही? यावरून आ. चव्हाण यांनी गुन्हे शाखेच्या पोलीसांना जाब विचारला. तसेच या ट्रक वरील संपूर्ण अवैध गुटख्याची तपासणी करावी. संबंधित गुटखा मालक व्यक्तींवर चौकशी करून कारवाई करावी, अशी मागणी आ.चव्हाण यांनी केली. दरम्यान, गुटख्याचा ट्रक जिल्हापेठ पोलीस स्थानकात आणण्यात आला असून गुटख्याची मोजणी सुरु आहे.
