लखनऊ (वृत्तसंस्था) उत्तरप्रदेशातील लखनऊ शेजारील बाराबंकी जिल्ह्यातील बबुरिया गावाजवळ गायीला वाचविताना डबलडेकर बस आणि ट्रकमध्ये भीषण अपघात झाला. या अपघातात १३ जणांचा मृत्यू तर २५ जण जखमी झाले आहेत.
मिळालेल्या माहितीनुसार, दिल्लीहून बहराईचच्या दिशेने डबल डेकर बस जात होती. त्याच दरम्यान बाराबंकी जिल्ह्यातील देवा पोलीस ठाण्याच्या हद्दीतील बबुरिया गावाजवळ आऊटर रिंगरोडच्या किसान मार्गावर एक गाय आली. या गायीला वाचवण्याचा प्रयत्न डबल डेकर बसच्या चालकाने केला आणि त्याचवेळी समोरून वाळूने भरलेल्या ट्रकला बसची धडक बसली. घटनास्थळी दाखल झालेल्या ग्रामस्थ आणि पोलिसांनी मदत-बचावकार्य सुरू करत जखमींना तात्काळ रुग्णालयात दाखल केलं. दरम्यान, अपघातानंतर उत्तरप्रदेशचे मुख्यमंत्री योगी आदित्यनाथ यांनी जखमींना योग्य ते आणि तात्काळ आवश्यक ते उपचार उपलब्ध करुन देण्याच्या सूचना दिल्या आहेत. तसेच बाराबंकी दुर्घटनेतील मृतकांच्या नातेवाईकांना प्रत्येकी दोन लाख रुपये आणि तर जखमींना प्रत्येकी ५० हजार रुपयांची आर्थिक मदत देण्याचेही निर्देश दिले आहेत.
