जळगाव (प्रतिनिधी) गणपती विसर्जनाच्या दिवशी बंद रस्त्याकडून जाण्यास मज्जाव करणाऱ्या पोलिस कर्मचाऱ्यास मारहाण करणाऱ्या दाम्पत्याविरुद्ध एमआयडीसी पोलिस ठाण्यात गुन्हा दाखल करण्यात आला आहे.
गणपती विसर्जनाच्या दिवशी रविवारी जळगाव-पाचोरा रस्त्यावरील वाहतूक वळविण्यात आली होती. लेक रेसिडेन्सीजवळ विसर्जनासाठी जाणार्‍या नागरिकांनाही प्रवेश नाकारण्यात आलेला होता. पोलिसांनी बॅरिकेट्स उभे करून रस्ता बंद केला होता. याठिकाणी रामानंदनगर पोलिस ठाण्याचे पोलिस कॉन्स्टेबल योगेश मधुकर ठाकूर तसेच नागपुरातील महामार्गचे दिनेश सुरेश माकरवार हे दोघं जण बंदोबस्त करीत होते. १९ सप्टेंबर रोजी दुपारी चार वाजेच्या सुमारास राजेंद्र सोनाजी वाजपेयी हे त्यांची पत्नी एकता वाजपेयी हिच्यासोबत दुचाकी (क्रमांक एम.एच.१९ डी.आर. ७०२३) यावरून जात होते. लेक रेसिडेन्सी जवळ लावलेले बॅरिकेड्स बाजूला करून ते जाण्याचा प्रयत्न करत होते. त्यामुळे बंदोबस्तावरील पोलिस कर्मचारी योगेश ठाकुर यांनी वाजपेयी दाम्पत्याला रोखत तुम्ही पुढील रस्त्याने जा असे सांगितले. याचा राग आल्याने राजेंद्र वाजपेयी यांनी योगेश ठाकूर या कर्मचार्‍यांची कॉलर पकडून त्याच्या छातीत बुक्का मारत शिवीगाळ करून चापटा बुक्क्यांनी मारहाण केली.
याचवेळी राजेंद्र वाजपेयी यांची पत्नी एकता ही सुद्धा पायातील चप्पल काढून पोलीस कर्मचाऱ्याच्या अंगावर धाऊन आली. यावेळी दुसरे पोलीस कर्मचारी योगेश ठाकूर यांच्यासोबत असलेले दिनेश माकरवार यांनी वाजपेयी दाम्पत्याला समजवण्याचा प्रयत्न केला मात्र ते ऐकण्याच्या मन स्थितीत नव्हते. एवढेच नवे तर गस्तीवरील शहर वाहतूक शाखेचे वाहन जात होते त्यांनीही वाजपेयी दाम्पत्याला समजवण्याचा प्रयत्न केला. अखेर दोघेही ऐकून घेण्याच्या मनस्थितीत नसल्याने पोलिसांनी सौम्य बळाचा वापर करून दाम्पत्याला ताब्यात घेतले. याप्रकरणी पोलिस कॉन्स्टेबल योगेश ठाकुर यांच्या फिर्यादीवरून राजेंद्र वाजपेयी व एकता वाजपेयी या दाम्पत्याविरोधात एमआयडीसी पोलिस ठाण्यात शासकीय कामात अडथळा निर्माण केल्याप्रकरणी गुन्हा दाखल करण्यात आला आहे.
