चाळीसगाव प्रतिनिधी : येथे अतिरिक्त जिल्हा व सत्र न्यायालयाच्या भव्य इमारतीसाठी तसेच मा. न्यायाधीशांच्या निवासस्थानांच्या बांधकामासाठी तब्बल १५० कोटी रुपयांचा निधी मंजूर झाल्याची माहिती आमदार मंगेश रमेश चव्हाण यांनी दिली. या ऐतिहासिक निर्णयानंतर चाळीसगाव वकील संघाच्या पदाधिकाऱ्यांनी आमदार चव्हाण यांची भेट घेऊन त्यांचा सत्कार केला.
गेल्या तीन दशकांपासून प्रलंबित असलेली अतिरिक्त न्यायालयीन इमारतीची मागणी आता प्रत्यक्षात साकार होत असल्याने वकील संघ आणि नागरिकांमध्ये समाधानाचे वातावरण आहे. न्यायालयीन इमारतीसाठी जागेच्या अडचणी, प्रशासकीय प्रक्रिया आणि मंत्रालयीन स्तरावरील निधी मंजुरी या सर्व टप्प्यांत सातत्याने पाठपुरावा करण्यात आल्याचे आमदार चव्हाण यांनी सांगितले.
या प्रक्रियेदरम्यान उच्च न्यायालयाचे माजी न्यायमूर्ती संगीतराव पाटील, चाळीसगाव वकील संघ, न्यायप्रेमी नागरिक आणि संबंधित अधिकाऱ्यांचे सहकार्य लाभल्याबद्दल त्यांनी आभार व्यक्त केले.
नवीन न्यायालयीन संकुल उभारल्यानंतर चाळीसगावकरांना कामानिमित्त जळगाव येथे वारंवार जावे लागणार नाही. त्यामुळे वेळ आणि आर्थिक खर्चाची बचत होणार असून न्यायप्रक्रिया अधिक सुलभ व गतिमान होईल, असा विश्वास व्यक्त करण्यात आला.
“चाळीसगावच्या नागरिकांना त्यांच्या हक्काचा न्याय त्यांच्या शहरातच मिळावा, हा आमचा निर्धार आहे. हा निर्णय त्या दिशेने टाकलेले महत्त्वाचे पाऊल आहे,” असे आमदार मंगेश चव्हाण यांनी नमूद केले. पुढील काळातही चाळीसगावच्या सर्वांगीण विकासासाठी प्रयत्न सुरू राहतील, असे त्यांनी स्पष्ट केले.
