धरणगाव (प्रतिनिधी) शहरातील अर्बन बँकेच्या काउंटरजवळ उभे असलेल्या ७० वर्षीय वृद्धाच्या पिशवीतून १ लाख रुपयांची रोकड अज्ञात दोन महिलांनी चोरून नेल्याची घटना सोमवारी ४ नोव्हेंबर रोजी दुपारी ४ वाजता घडली. याप्रकरणी धरणगाव पोलीस ठाण्यात दोन अज्ञात महिला चोरट्यांवर गुन्हा दाखल करण्यात आला आहे.
आनंदा फकीरा गुजर (वय- ७०, रा.जांभोरा ता. धरणगाव), हे वृद्ध सोमवारी ४ नोव्हेंबर रोजी दुपारी ४ वाजता ते कामाच्यानिमित्ताने धरणगाव शहरातील अर्बन बँकेत आले होते. त्यावेळी त्यांनी त्यांच्याजवळील दीड लाख रुपयांपैकी ५० हजार रुपयांचा भरणा बँकेत केला व उर्वरित एक लाख रुपयांची रोकड त्यांनी पिशवीत ठेवली होती. त्यावेळी त्यांच्या मागे उभे असलेल्या दोन अज्ञात महिलांनी त्यांच्या पिशवीतून १ लाख रुपयांची रोकड हातचलाखीने काढून चोरी केली. दरम्यान ही घटना घडल्यानंतर आनंदा गुजर यांनी तत्काळ धरणगाव पोलीस ठाण्यात धाव घेत तक्रार दिली. त्यानुसार अज्ञात दोन महिलांविरोधात गुन्हा दाखल करण्यात आला असून पुढील तपास पोलीस कॉन्स्टेबल चंद्रकांत पाटील करीत आहे.
