पुणे (वृत्तसंस्था) पुण्यातील चतु:श्रृंगी पोलीस ठाण्याच्या हद्दीत एका व्यक्तीने आपला घटस्फोट झाल्याचं सांगून एका २७ वर्षीय तरुणीवर वारंवार बलात्कार केला (young woman raped by married man) आहे. धक्कादायक बाब म्हणजे आरोपीच्या या काळ्या कृत्यात त्याच्या पत्नीचा देखील सहभाग आहे. आरोपी पीडितेवर जबरदस्तीने अत्याचार करत असताना, तिने दोघांचे अश्लील फोटो क्लिक केले आहेत.
विकृत जोडपं केवळ एवढ्यावरच थांबलं नाही, तर त्यांनी पीडित तरुणीचे न्यूड फोटो तिच्या पतीला पाठवून तिची बदनामी केली आहे. या प्रकरणी २७ वर्षीय पीडितेनं चतु:श्रृंगी पोलीस ठाण्यात फिर्याद दाखल केली आहे. पोलिसांनी बलात्कारासह विविध कलमाअंतर्गत गुन्हा दाखल केला आहे. विशाल गायकवाड (वय ४७) असं गुन्हा दाखल झालेल्या आरोपीचं नाव असून तो कोंढवा परिसरातील पॅराडाईज व्हिला येथील रहिवासी आहे. या प्रकरणी पोलिसांनी आरोपीच्या पत्नीवर देखील गुन्हा दाखल केला आहे. या घटनेचा पुढील तपास पोलीस करत आहेत.
पीडितेनं दिलेल्या तक्रारीनुसार, आरोपी विशाल आणि पीडित तरुणीची सर्वप्रथम २०१८ साली ओळख झाली होती. पीडित तरुणीच्या व्यवसायात गुंतवणूक करायची असल्याचं सांगत आरोपीनं पीडितेशी जवळीक साधली होती. तसेच आपला घटस्फोट झाला असल्याचं खोटं सांगून पीडितेला लग्नाचं आमिष दाखवलं. तसेच माझी पत्नी केवळ पैशांसाठी माझ्यासोबत राहते, अशी खोटी माहिती आरोपीनं पीडितेला दिली.
यानंतर आरोपीनं २०१८ पासून २ फेब्रुवारी २०२२ पर्यंत टर्फ क्लब हाऊस, कॅम्प व पाषाण येथील आपल्या घरी पीडितेवर जबरदस्तीने शारीरिक संबंध ठेवले आहेत. दरम्यान आरोपीच्या पत्नीने दोघांचे अश्लील फोटो आपल्या मोबाइलमध्ये क्लिक केले आहेत. तू माझ्यासोबत राहिली नाहीस तर ‘तुला जीवे मारेन’ अशी धमकी देखील आरोपीनं पीडितेला दिली. नराधम जोडपं एवढ्यावरचं थांबलं नाही, तर त्यांनी पीडित तरुणीच्या लग्नानंतर तिच्या पतीला दोघांचे अश्लील फोटो पाठवून बदनामी केली आहे. या घटनेचा पुढील तपास पोलीस करत आहेत.
