नाशिक (वृत्तसंस्था) दोन लाखांची लाच स्वीकारल्याप्रकरणी केंद्रीय गुन्हे अन्वेषण पथकाने (सीबीआय) नाशिक भविष्य निर्वाह निधी कार्यालयातील विभागीय आयुक्त गणेश प्रसाद आरोटे यांच्यासह अजय आहुजा आणि खासगी सल्लागार मंगलकर यांना गुरुवार (दि. २८) रंगेहाथ ताब्यात घेतले. त्यांना न्यायालयाने १ जानेवारी २०२४ पर्यंत पोलिस कोठडी सुनावण्यात आली आहे.
नेमकं काय आहे प्रकरण !
तक्रारदाराने ईपीएफओ अधिकारी यांच्याकडे बँक खाते विवरण सादर केले होते. या प्रकरणाची आहुजा यांनी चौकशी केली. तक्रारदाराकडे पुन्हा आहुजा यांनी तक्रारदाराला एकूण १० लाख ५० हजार रुपये पीएफ भरला नाही असे सांगून २ लाखांची लाचेची मागणी करून प्रकरण थांबवितो, असे सांगितले. लाचेची रक्कम मंगलकर यांनी दोघा अधिकाऱ्यांच्या सांगण्यावरून स्वीकारली. यामुळे पथकाने भविष्य निर्वाह निधी विभागीय आयुक्त गणेश आरोटे, अधिकारी अजय आहुजा यांनाही अटक केली.
फोन रेकॉर्डिंगवरून झाली खात्री !
सीबीआयच्या पथकाकडे याबाबत तक्रार प्राप्त होताच त्यांनी तक्रारदाराला आयुक्त आरोटे, आहुजा व मध्यस्थ मंगलकर यांच्याशी पैसे मागणीचा संवाद फोनमध्ये रेकॉर्डिंग करण्यास सांगितले. ते काम पूर्ण झाल्यावर बुधवारी रात्री पैसे घेण्यासाठी कार्यालयाच्या आवारात बोलावण्यात आले. त्याचवेळी पथकाने मंगलकर व आहुजा यांना अटक केली. या दोघांच्या चौकशीअंती रात्री उशिरा आयुक्त आरोटे यास अटक करण्यात आली आहे.
सात ठिकाणी झडती, रोकड, दागिने जप्त !
आयुक्त आरोटे, अजय आहुजा व मंगलकर यांच्या नाशिकमधील घर व कार्यालय अशा सात ठिकाणी झडती घेण्यात आली. त्यात आरोटेच्या घरी काही रोकड, दागिने व महत्त्वाचे दस्तऐवज हाती लागले. तर अहुजाकडेही मालमत्तेची कागदपत्रे जप्त करण्यात आली
