भडगाव (प्रतिनिधी) भडगाव पोलिसांनी महाराष्ट्रासह कर्नाटकात तब्बल 54 गुन्हे दाखल असलेल्या कुविख्यात चोरट्याला बेड्या ठोकल्या आहेत. आरोपीने सात महिन्यांपूर्वी भडगावात घरफोडी केल्यानंतर त्यास अटक करण्यात आली तर घरफोडीतील 120 ग्रॅम वजनाचे सोन्याचे दागिने छत्तीसगड राज्याच्या रायपूर येथून हस्तगत करण्यात आले. प्रशांत काशिनाथ करोशी (38, ईस्पूर्ली, ता.करवीर, जि.कोल्हापूर) असे अटकेतील आरोपीचे नाव आहे. आरोपी पोलिसांना चकमा देण्यासाठी चोर्या केल्यानंतर गोवा, दिल्ली, बंग्लोर येथील हॉटेलमध्ये मौजमस्ती करीत असल्याचे समोर आले आहे.
भडगावातील घरफोडीची उकल
भडगाव येथील विद्यानगर परिसरातील रहिवासी प्रकाश भोसले यांच्या बंद घरात चोरीचा प्रकार 12 डिसेंबर 2023 रोजी घडला होता. या घटनेत बेडरुममधील कपाटाचे कुलुप तोडून सोन्या चांदीचे दागीने व रोख रक्कम असा एकूण 10 लाख 86 हजार 400 रुपये किंमतीचा मुद्देमाल चोरी झाला होता. याप्रकरणी भडगाव पोलिस स्टेशनला गुन्हा दाखल होता. गुन्ह्याचा तपास पोलिस उपनिरीक्षक शेखर डोमाळे करीत होते. तपासादरम्यान आरोपी प्रशांत करोशी यास वर्धा येथून ताब्यात घेत अटक करण्यात आली. त्याने दिलेल्या माहितीनुसार त्याने चोरी केलेल्या सोन्या चांदीच्या दागिन्यांपैकी 120 ग्रॅम वजनाचे 8 लाख 64 हजार रुपये किंमतीचे सोने छत्तीसगड राज्यातील रायपूर येथून हस्तगत करण्यात आले.
यांनी केली कारवाई
ही कारवाई पोलीस निरीक्षक पांडुरंग पवार यांच्या नेतृत्वात पोलीस उपनिरीक्षक शेखर डोमाळे, किरण रवींद्र पाटील, प्रवीण कडू परदेशी, संदीप सोनवणे यांनी केली.
