भडगाव ( प्रतिनिधी ) : शांतताप्रिय समजल्या जाणाऱ्या भडगाव तालुक्यात मागील एका महिन्याच्या काळात घडलेल्या दोन थरारक घटनांनी संपूर्ण जिल्ह्याचे लक्ष भडगाव तालुक्याकडे वेधले गेले आहे. शहरात एमडी ड्रग्जची विक्री करणाऱ्या दाम्पत्याला अटक होणे आणि दुसऱ्या घटनेत एका २३ वर्षीय तरुणाने गावठी कट्ट्यातून गोळी झाडून आत्महत्या करणे, या दोन्ही घटनांनी तालुक्यातील कायदा व सुव्यवस्थेवर प्रश्नचिन्ह उभे केले आहे. गुन्हेगारीच्या या वाढत्या मुळाशी जाणे आता पोलीस प्रशासनासमोर मोठे आव्हान ठरणार आहे.
पोलीस प्रशासनाकडून अशा घटनांबाबत कडक कारवाईची अपेक्षा निर्माण झाली आहे. ड्रग्ज आणि शस्त्रास्त्रे या दोन्ही घटना एकमेकांशी निगडीत नसल्या तरी, तालुक्यातील गुन्हेगारी वाढण्यास या दोन्ही गोष्टी कारणीभूत आहेत. एनडीपीएस अॅक्ट अंतर्गत अमली पदार्थांची विक्री, हा अत्यंत गंभीर गुन्हा असतानाही, त्या गुन्ह्याचा तपास थंडावणे, ही बाब चिंताजनक आहे. तर, भडगाव तालुक्यातील तरुणाई नशेच्या आणि गुन्हेगारीच्या आहारी जाऊ नये, यासाठी पोलीस निरीक्षकांनी या दोन्ही प्रकरणांत लक्ष घालून सखोल तपास करावा. ड्रग्ज रॅकेटच्या मुळाशी जाऊन मुख्य सूत्रधारांना जेरबंद करावे, तरच भडगावची शांतता अबाधित राहिल.
तपास थंडावला
महिन्याभरापूर्वी जुना पारोळा रोड परिसरात एका कारमधून अमली पदार्थ (एमडी ड्रग्ज) हस्तगत करण्यात आले होते. याप्रकरणी एका महिलेसह तिच्या पतीला ताब्यात घेतले होते. भडगाव तालुक्याच्या इतिहासात पहिल्यांदाच अशी कारवाई झाल्याने खळबळ उडाली होती. या कारवाईचे श्रेय पो.उ.नि. सुशील सोनवणे यांना जाते. हे दाम्पत्य ड्रग्ज कुणाकडून विकत घेत होते आणि तालुक्यातील त्यांचे पेड्लर कोण होते ? हा काळा व्यवसाय सुरळीत चालण्यासाठी काही स्थानिक पोलिसांचे पाठबळ होते का? त्यांच्यात काही आर्थिक व्यवहार होत होते का? तो पोलीस कोण? आरोपीच्या मोबाईलमधून काही पेड्लरस, पोलिसांचे संपर्क नबर मिळले का? याची उकल होणे आवश्यक होते. मात्र, अधिकारी बदलल्याने तपासाला ब्रेक लागला. या गुन्ह्याचे तपास अधिकारी महेश शर्मा यांची दुसऱ्या एका प्रकरणात कर्तव्यात कसूर केल्याचा ठपका ठेवत उचलबांगडी झाली. परिणामी, या महत्त्वाच्या तपासाची गती मंदावली आहे.
