जळगाव (प्रतिनिधी) – बंद घराला लक्ष करत मुद्देमाल चोरुन नेण्याचा चोरट्यांचा धडाका सुरुच आहे. शहरात डॉक्टराचे कुलुपबंद घर भर दिवसा फोडुन चोरट्यांनी रोकड व दागिने असा सुमारे ६५ हजार रुपयांचा मुद्देमाल चोरुन नेला. शहरातील भगीरथ कॉलनी राधा अपार्टमेंट येथे ही घटना बुधवारी सकाळी नऊ ते साडेबारा वाजेच्या सुमारास घडली.
उमाकांत दिलीप जावळे (वय ४२, रा. ममुराबाद, ह.मु. राधा अपार्टमेंट जळगाव) हे पेशाने डॉक्टर आहेत. सकाळी नऊ वाजता घराच्या मुख्य दरवाजाला कुलुप लावुन ते कामानिमित्त बाहेर गेले होते. ही संधी हेरत चोरट्यांनी अपार्टमेंटमध्ये प्रवेश करत राहत्या घराच्या दरवाज्याचा कडीकोंडा तोडत आमध्ये एन्ट्री केली.
घरात मुद्देमालाचा शोधात सामान अस्तव्यस्त केला. गोदरेज कपाट उघडुन पाहिले. कपाटाचे लॉकरमध्ये ठेवलेली रोकड व दागिने हाती लागताच चोरटे पसार झाले. दुपारी डॉ. जावळे हे घरी आले असता त्यांना दरवाज्याचा कडीकोंडा तुटलेला दिसला. घरात सामान विखुरलेल्या अवस्थेत पडलेला होता. गोदरेज कपाटाच्या लॉकरमधील मुद्देमाल गहाळ झाल्याचे दिसुन आले. त्यांनी या प्रकरणी खबर जिल्हापेठ पोलीस ठाण्यात दिली. सपोनि अनिल वाघ, ग्रेड.पीएसआय उल्हास चऱ्हाटे यांनी घटनास्थळी जावुन प्रकार जाणुन घेतला. या प्रकरणी जिल्हापेठ पोलीस ठाण्यात गुरुवारी गुन्हा दाखल करण्यात आला.
दागिन्यासह रोकड लंपास
२५ हजार रुपयांची रोकड, ४० हजार रुपये किमतीचे २० ग्रॅम वजनाची पोत, पाच ग्रॅम वजनाची कानातील रिंग, पाच ग्रॅम वजनाची अंगठी, पाच ग्रॅम वजनाची महिलेची अंगठी, सहा ग्रॅम वजनाची कानातील बाली असा सुमारे ६५ हजार रुपये किमतीचा मुद्देमाल चोरट्यांनी चोरुन नेला.
