जळगाव (प्रतिनिधी) शहरातील बसस्थानक परिसरात गर्दीचा फायदा घेत प्रवाशांचे खिसे कापून चोरी करणाऱ्या अमरावती येथील अट्टल टोळीचा पर्दाफाश करत स्थानिक गुन्हे शाखेच्या पथकाने तिघांना अटक केली. या कारवाईत सुमारे ५ लाख ५१ हजार ५३० रुपये किमतीचा मुद्देमाल हस्तगत करण्यात आला असून, आरोपींविरुद्ध जिल्हापेठ पोलीस ठाण्यात गुन्हा दाखल करण्यात आला आहे.
जिल्ह्यात अलीकडील काळात गर्दीच्या ठिकाणी खिसे कापून रोख रक्कम चोरी होण्याचे प्रकार वाढले होते. या पार्श्वभूमीवर पोलीस अधीक्षक डॉ. महेश्वर रेड्डी यांनी विशेष लक्ष देण्याच्या सूचना स्थानिक गुन्हे शाखेला दिल्या होत्या. या सूचनेनुसार वरिष्ठ पोलीस निरीक्षक संदीप पाटील यांनी आपल्या अधिनस्त अधिकाऱ्यांना अशा प्रकारचे गुन्हे करणाऱ्या टोळ्यांवर लक्ष ठेवण्याचे आदेश दिले होते.
२५ जून २०२५ रोजी स्थानिक गुन्हे शाखेतील पोलीस कर्मचारी प्रविण भालेराव व अक्रम शेख यांना गोपनीय माहिती मिळाली की, जळगाव बसस्थानक परिसरात अमरावती येथील खिसे कापणारे काही रेकॉर्डवरील गुन्हेगार फिरत आहेत. ही माहिती वरिष्ठ पोलीस निरीक्षक संदीप पाटील यांना कळवण्यात आली. त्यानंतर पोलीस उपनिरीक्षक शरद बागल यांच्या नेतृत्वाखाली पोलीस कर्मचारी अक्रम शेख, नितीन बाविस्कर, प्रविण भालेराव, किशोर पाटील आणि रविंद्र कापडणे यांचे पथक तयार करण्यात आले. या पथकाने बसस्थानक परिसरात पेट्रोलिंग सुरू केले.
तिघांना अटक
पेट्रोलिंग दरम्यान संशयास्पद हालचाल करणारे तीन इसम पथकाच्या निदर्शनास आले. त्यांनी गर्दीचा फायदा घेत चोरी करण्याचा प्रयत्न केल्याचे दिसून आले. तात्काळ कारवाई करत पथकाने त्यांना ताब्यात घेत स्थानिक गुन्हे शाखा कार्यालयात आणून चौकशी केली. चौकशीत त्यांनी आपली नावे अहमद बेग कादर बेग (वय ६२, रा. मुजफ्फरपुरा, नागपुरी गेट जवळ, अमरावती), हफिज शाह हबीब शाह (वय ४९, रा. बलगाव, सकीनगर, अमरावती) आणि अजहर हुसैन हफर हुसेन (वय ४९, रा. रहमतनगर, अमरावती) अशी सांगितली.
५ लाख ५१ हजार ५३० रुपयांचा मुद्देमाल जप्त
अधिक तपास घेतला असता त्यांनी २४ जून रोजी दुपारी जळगाव बसस्थानकात एका प्रवाशाच्या खिशातून १०० रुपयांच्या नोटांचे दोन बंडल चोरी केल्याचे कबूल केले. त्यानंतर त्यांच्या अंगझडतीत ३३,८३० रुपये रोख रक्कम, अंदाजे १७,५०० रुपये किमतीचे पाच मोबाईल फोन्स, एक रेक्झीन बॅग आणि अंदाजे ५ लाख रुपये किमतीची टाटा इंडिका व्हिस्टा कार असा एकूण ५ लाख ५१ हजार ५३० रुपयांचा मुद्देमाल हस्तगत करण्यात आला.
या तिघांविरुद्ध जिल्हापेठ पोलीस ठाण्यात भारतीय दंड संहिता २०२३ च्या कलम ३०३(२) नुसार गुन्हा दाखल करण्यात आला आहे. विशेष म्हणजे आरोपी अहमद बेग कादर बेग याच्यावर अमरावती शहरातील विविध पोलीस ठाण्यांमध्ये आधीच चार गुन्हे दाखल असल्याचे निष्पन्न झाले आहे.
या संपूर्ण कारवाईसाठी पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी संदीप गावित आणि स्थानिक गुन्हे शाखेचे वरिष्ठ पोलीस निरीक्षक संदीप पाटील यांच्या मार्गदर्शनाखाली संयुक्तरित्या नियोजन करून प्रत्यक्ष कारवाई करण्यात आली.
दरम्यान, पोलीस अधीक्षक डॉ. महेश्वर रेड्डी यांनी नागरिकांना आवाहन केले आहे की, गर्दीच्या ठिकाणी, विशेषतः बसस्थानक, रेल्वे स्टेशन आणि बाजारपेठांमध्ये प्रवास करताना आपल्या मौल्यवान वस्तूंची काळजी घ्यावी. संशयास्पद व्यक्ती आढळल्यास त्वरित डायल ११२ या टोल फ्री क्रमांकावर माहिती द्यावी, असे आवाहनही त्यांनी केले आहे.
