रावेर (प्रतिनिधी) सध्या तालुक्यात लाकडाच्या तस्करीला आळा घालण्यासाठी वनविभागाने कडक कारवाई सुरू केली आहे. २७ जानेवारी रोजी रात्री ११ वाजता वनपरिक्षेत्र अधिकारी अजय बावने रावेर यांना मिळालेल्या गुप्त माहितीवरून, सावदा ते तांदलवाडी रस्त्यावर गस्त घेत असताना तांदळवाडी गावाजवळ महिंद्रा कंपनीची बोलेरो पिकअप गाडी संशयास्पद आढळली. गाडीचा पाठलाग केल्यावर, वाहन क्रमांक एमएच ०४ जीएफ-७२६३ असलेल्या गाडीची तपासणी केली असता, त्यात २५ साग इमारती नगांचा माल सापडला.
वाहनचालक युवराज सिताराम तायडे (वय ३५) रा. मांगलवाडी यांच्याकडे या मालाची परवानगी संबंधित कागदपत्रं विचारली असता, त्यांच्याकडे कोणताही परवाना नसल्याचे स्पष्ट झाले. तपासणी दरम्यान, गाडीमध्ये सापडलेल्या सागवानी मालाचे मोजमाप १२२१ घ. मी. झाले, ज्याची किंमत अंदाजे ४३ हजार ११६ रुपये आहे. तसेच, ताब्यात घेतलेल्या पिकअप गाडीची किंमत अंदाजे ३ लाख ४५ हजार रुपये आहे.
ही कारवाई धुळे वनसंरक्षक निनू सोमराज, उपवनसंरक्षक जमीर शेख, विभागीय वनधिकारी आर.आर. सदगीर, चोपडा सहाय्यक वनसंरक्षक प्रथमेश हडपे आणि यावल सहायक वनसंरक्षक समाधान पाटील यांच्या मार्गदर्शनाखाली केली गेली. रावेर वनपरिक्षेत्र अधिकारी अजय बावणे, आगार रक्षक सुपडू सपकाळे, जुनोना वनरक्षक जगदीश जगदाळे, वाहन चालक विनोद पाटील तसेच विशेष पेसा वनरक्षक रावेर रेंज थवऱ्या बारेला, कियारसिंग बारेला, आकाश बारेला आणि निलेश बारेला यांच्या पथकाने ही कारवाई केली.
