बोदवड (प्रतिनिधी) तालुक्यातील आमदगाव येथील विशाल किसन पाचपांडे (वय ३०) या तरुण शेतकऱ्याचा इलेक्ट्रिक शॉक लागून शेतातच मृत्यू झाल्याची दुर्दैवी घटना दि. २८ रोजी मध्यरात्री उघडकीस आली.
मध्यरात्री बारा वाजेच्या सुमारास आमदगाव शिवारातील राकेश संजय पाटील यांच्या शेतातील मोटरीच्या इलेक्ट्रिक डीपी जवळ इलेक्ट्रिक मोटार चालू करण्यासाठी गेला असता विशाल पाचपांडे या शेतकऱ्याला शॉक लागला. विशाल पाचपांडे जमिनीवर खाली पडल्यानंतर त्यांना उपचारासाठी बोदवड ग्रामीण रुग्णालयांमध्ये दाखल केले असता वैद्यकीय अधिकारी यांनी तपासून त्यांना मृत घोषित केले. विलास ज्ञानदेव बऱ्हाटे यांच्या खबरीवरून बोदवड पोलीस स्टेशनमध्ये अकस्मात मृत्यूची नोंद करण्यात आली आहे.
बोदवड तहसीलदार यांना रिपोर्ट पाठवण्यात आला असून पुढील तपास पोलीस हेड कॉन्स्टेबल अय्युब तडवी हे करीत आहेत. मृत विशाल पाचपांडे या तरुण शेतकऱ्याच्या मृत्यूने सर्वत्र हळहळ व्यक्त केली जात आहे. विशाल पाचपांडे यांच्या पश्चात वृद्ध आई-वडील, पत्नी व पाच वर्षाची एक मुलगी असा परिवार आहे. त्यांचे शवविच्छेदन केल्यानंतर शोकाकुल वातावरणात विशाल पाचपांडे यांच्यावर गावी अंत्यसंस्कार करण्यात आले आहे.
