भडगाव (प्रतिनिधी) नुकताच भडगाव महाविद्यालयात विज्ञान शाखेत प्रवेश घेत उज्वल भवितव्याची स्वप्न बघणाऱ्या तरूणासोबत नियतीने घात केला केल्याची दुर्दैवी घटना घडली आहे. पारोळा- कोळगाव रस्त्यावरील वीज वितरण कार्यालयाजवळ दुचाकीला भरधाव पेट्रोल टँकरने दिल्याने भावेश रामेश्वर पाटील (रा.शिंदी) या २१ वर्षीय तरुणाचा जागीच मृत्यू झाला. दि. २२ रोजी दुपारी ३ वाजेच्या सुमारास ही घटना घडली.
भावेश हा त्याच्या दुचाकीने जात असताना त्यास पेट्रोल टँकरने जोरदार धडक दिली. यात भावेश पाटील हा गंभीर जखमी झाला. त्याला भडगाव ग्रामीण रुग्णालयात नेण्यात आले असता तेथे वैद्यकीय अधिकाऱ्यांनी मृत घोषित केले. भावेश याने नुकताच भडगाव महाविद्यालयात विज्ञान शाखेत प्रवेश घेतला होता. शिक्षण घेऊन मोठे होण्याची त्याची इच्छा होती. परंतू तोपूर्वीच नियतीने घात केला.
या प्रकरणी मृताचे काका बापूराव विक्रम पाटील यांच्या फिर्यादीवरून भडगाव पोलिस ठाण्यात पेट्रोल टँकर चालक दत्तू गंगाधर धानगे ( रा. भालूर, ता. नांदगाव) यांच्या विरूद्ध गुन्हा दाखल करण्यात आला असून घटनेचा तपास पोलिस निरीक्षक राजेंद्र पाटील यांच्या मार्गदर्शनाखाली सहाय्यक फौजदार पांडुरंग सोनवणे करीत आहे.
