जळगाव (प्रतिनिधी) मुलांना खाऊ घेण्यासाठी जात असलेल्या गजानन विकास बाविस्कर (वय ३०, रा. शिवाजीनगर हुडको) याच्यावर एकाने धारदार चाकूने वार केले, तर दुसऱ्याने दगडाने मारहाण करुन दुखापत केली. ही घटना शिवाजी नगरातील चौकात घडली. याप्रकरणी शहर पोलिसात गुन्हा दाखल करण्यात आला आहे.
शहरातील शिवाजी नगर हुडको परिसरात गजानन विकास बाविस्कर हा तरुण वास्तव्यास असून तो एका कंपनीत मजूरी काम करतो. त्याचे यापुर्वी मनिष बिऱ्हाडे याच्यासोबत भांडण झाल्याने त्याने गजाननच्या डोक्यात कुऱ्हाड मारली होती. दि. २३ रोजी रात्री साडेअकरा वाजेच्या सुमारास गजानन बाविस्कर हा मुलांना खाऊ घेण्याकरीता शिवाजी नगर चौकात रिक्षातून उतरला. यावेळी जून्या भांडणाच्या कारणावरुन मनिष बिऱ्हाडे याने चाकूने त्याच्या हातावर आणि डोक्यावर वार केले. त्यावेळी संगम देवा भोई व क्रिष्णा पांडुरंग सोनवणे यांच्यासह इतर जणांनी त्याच्या छातीवर व पायावर दगडाने मारहाण केली. यावेळी तो रस्त्यावर कोसळला असता, मनिष बिऱ्हाडे याने दगड उचलून त्याच्या पायावर टाकला. यामुळे त्याच्या पायाच्या हाडाचे तुकडे झाले आहे.
बेशुद्ध अवस्थेत केले रुग्णालयात दाखल
या मारहाणीत गजानन बाविस्कर हा बेशुद्ध पडला होता, त्याला नागरिकांनी तात्काळ तशाच अवस्थेत जिल्हा शासकीय वैद्यकीय महाविद्यालय व रुग्णालयात दाखल केले. याठिकाणी त्याच्यावर उपचार सुरु असून त्याने दिलेल्या जबाबावरुन शहर पोलीस ठाण्यात गुन्हा दाखल करण्यात आला आहे.
