चोपडा (प्रतिनिधी) तालुक्यातील एका गावातील १२ वर्षीय अल्पवयीन मुलीला मक्याच्या शेतात नेऊन तिच्यावर अत्याचार केल्याची संतापजनक घटना उघडकीस आली आहे. या प्रकरणी पोलिसांनी १९ वर्षीय सौरव महेंद्र पाटील, या संशयित आरोपीला अटक केली आहे. चोपडा न्यायालयाने सौरवला दोन दिवसांची पोलीस कोठडी सुनावली आहे.
सौरव महेंद्र पाटील याने २३ ऑगस्टला दुपारी १२ ते २ वाजेदरम्यान अल्पवयीन मुलीचा हात धरून तिला बळजबरीने दुचाचीवर बसवून गावातील महाविद्यालयाजवळील मक्याच्या शेतात नेले. तेथे त्याने या मुलीवर अत्याचार केला. तसेच घडलेल्या घटनेबद्दल चर्चा केल्यास ठार मारण्याची धमकीही दिली. या प्रकरणी पीडितीच्या फिर्यादीवरून चोपडा शहर पोलिस ठाण्यात विविध कलमांसह बालकांचे लैंगिक अपराधापासून संरक्षण अधिनियम २०१२चे कलम ४, ८ प्रमाणे सौरव पाटील याच्यावर गुन्हा दाखल करण्यात आला आहे. आरोपी सौरव पाटील याला पोलिसांनी अटक केली आहे. तर चोपडा न्यायालयाने दोन दिवसांची पोलीस कोठडी सुनावली आहे. या घटनेचा तपास उपविभागीय पोलीस अधिकारी डॉ. कुणाल सोनवणे करत आहेत.
