जळगाव (प्रतिनिधी) – नफ्याचे अमिष दाखवून मयूर हेमंत व्यास (२६, रा. सिद्धीविनायक पार्क, जळगाव) या एसी सव्र्व्हस सेंटर चालकालाला ऑनलाईन ठगांनी ९ लाख ५६ हजारात ऑनलाईन गंडविले. ही घटना उघडकीस आसल्यानंतर त्यांनी दि. २० रोजी सायबर पोलिसात तक्रार दिली त्यानुसार गुन्हा दाखल करण्यात आला आहे.
शहरात एसी सर्व्हस सेंटरचा व्यवसाय असलेले मयूर व्यास यांना दि. १४ जुलै रोजी टेलिग्राम चॅनल ग्रुपला अॅड होण्यासंदर्भात मेसेज आला. स्टॉक मार्केटमध्ये गुंतवणूक केल्यास चांगला नफा मिळवून देण्याविषयी सांगण्यात आल्याने त्यांनी होकार दिला. त्यासाठी २० हजार रुपये गुंतवून टास्क पूर्ण करण्यास सांगितल्याने त्यांनी ती रक्कम पाठविली. नंतर त्यांना पुन्हा टास्क दिल्याने त्यांनी ५९ हजार ८०० रुपये पाठविले. हा टास्क पूर्ण न झाल्याचे सांगण्यात आल्याने त्यांनी पुन्हा १८ हजार रुपये पाठविले. वेळोवेळी त्यांना अधिकच्या नफ्याचे अमिष दाखवून व्यास यांच्याकडून एकूण ९ लाख ५६ हजार ९०० रुपये स्वीकारण्यात आले. वारंवार रक्कम मागूनही परत न मिळाल्याने व्यास यांनी सायबर पोलिस ठाण्यात फिर्याद दिली. त्यावरून गुन्हा दाखल करण्यात आला आहे.
