जळगाव (प्रतिनिधी) बऱ्हाणपुर येथून देवीची मुर्ती घेवून येत असतांना वाहनाला झालेल्या अपघातात देवीची मुर्ती अंगावर पडून एकाचा मृत्यू झाल्याची दुर्दैवी घटना मुक्ताईनगर तालुक्यातील पुर्णाड फाट्याजवळ रविवारी पहाटेच्या सुमारास घडली. संजय उर्फ जितू गोपाल कोळी (वय ३५ रा. जोशी वाडा मेहरूण), असे मयत तरुणाचे नाव आहे.
मेहरूणमधील जोशी वाड्यात संजय उर्फ जितू कोळी हा तरुण वास्तव्यास होता. त्यांच्या घराजवळ नवरात्रोत्सवानिमित्त देवीची स्थापना केली जाणार होती. त्यासाठीची संपुर्ण तयारी झाली होती तर काही कार्यकर्ते हे देवीची मुर्ती आणण्यासाठी शनिवारी बऱ्हाणपूर येथे गेले होते. मुर्ती घेवून परतत असतांना शनिवारी मध्यरात्रीच्या सुमारास मुक्ताई नगरातील पुर्णाड फाट्यावर त्यांच्या वाहनाचा अपघात झाला. या अपघातामध्ये देवीची मूर्ती जितू उर्फ संजय कोळी यांच्या अंगावर पडल्याने त्याच्याखाली दबले गेले. त्यामुळे त्यांना लागलीच मुक्ताई नगर येथील उपजिल्हा रुग्णालयात दाखल करण्यात आले. त्यांच्यावर उपचार सुरु असतांना त्यांची प्राणज्योत मालवली.
अपघातातील जखमींवर उपचार सुरु आहे. संजय कोळी एमआयडीसीतील एका कंपनीमध्ये तो स्लाईडींगचे खिडकी बनविण्याचे काम करीत होता. याप्रकरणी मुक्ताईनगर पोलीस स्टेशनला आकस्मात मृत्यूची नोंद करण्यात आली. संजय कोळी यांच्या पश्चात आई-वडील, पत्नी, एक मुलगा, एक मुलगी आणि दोन भाऊ असा परिवार आहे.
