धरणगाव (प्रतिनिधी) शहरातील आठवडे बाजारासाठी जाणाऱ्या दुचाकीस्वार तरुणाला अज्ञात भरदार ट्रकने चिरडल्याची घटना गुरुवारी २३ नोव्हेंबर रोजी सकाळी पिंपळे व निशाणे फाट्याच्या जवळ घडली. सागर छगन कोळी (वय-२८ रा.नांदेड ता.धरणगाव), असे मयत तरुणाचे नाव आहे.
धरणगाव तालुक्यातील नांदेड येथील रहिवाशी सागर कोळी हा गुरुवारी धरणगावच्या आठवडे बाजारात बाजार करण्यासाठी सकाळी ९.३० वाजता आपल्या दुचाकीने निघाला होता. पिंपळे व निशाणे फाट्याच्या जवळील रस्त्यावरून जात असतांना समोरून अज्ञात भरधाव ट्रकने त्याच्या दुचाकीला जोरदार धडक दिली. या धडकेत सागर हा तरुण जागीच ठार झाला. अपघातानंतर ट्रक चालक पसार झाला. या संदर्भात सागर कोळी यांचे काका भागवत यशवंत कोळी यांनी धरणगाव पोलिसात तक्रार दिली आहे. त्यानुसार अज्ञात ट्रक चालक विरोधात धरणगाव पोलिसात गुन्हा दाखल करण्यात आला असून या घटनेचा पुढील तपास पोलीस नाईक प्रदीप पवार हे करीत आहे.
