जळगाव (प्रतिनिधी) शहरातील रामानंद आणि शनिपेठ पोलीस स्थानकाच्या हद्दीतील दोन कुख्यात गुन्हेगारांविरुद्ध ‘एमपीडीए’ची कारवाई करण्यात आल्यामुळे गुन्हेगारी वर्तुळात खळबळ उडाली आहे. शहजादखान ऊर्फ लल्ला सलीम खान (वय २५ रा. काटया फाईल, शनिपेठ) आणि मयुर ऊर्फ विक्की दिलीप अलोणे (वय ३९ रा.बारसे कॉलनी,स्मशान भुमी जवळ, जळगाव) असे दोघांची नावे असून याबाबतचे आदेश जिल्हाधिकारी आयुष प्रसाद यांनी काढले आहेत.
शनिपेठ पोलिस ठाण्याच्या हद्दीतील रहिवासी शहजाद खान याच्यावर वेगवेगळ्या स्वरुपाचे ६ गुन्हे दाखल असून त्याच्यावर तीन वेळा प्रतिबंधात्मक कारवाई करण्यात आली. तरीदेखील त्याच्या वर्तणुकीत सुधारणा न झाल्याने शनिपेठ पोलिस ठाण्याचे पोलिस निरीक्षक रंगनाथ धारबळे यांनी त्याच्यावर एमपीडीएचा प्रस्ताव स्थानिक गुन्हे शाखेकडे पाठविला होता. तो प्रस्ताव पोलिस अधीक्षक एम. राजकुमार यांना पाठविण्यात आला. यानंतर त्यांनी एमपीडीए कारवाईची मंजुरी देऊन तो जिल्हाधिकाऱ्यांकडे सादर केला. त्याला स्थानबद्ध करण्याचे आदेश जिल्हाधिकारी आयुष प्रसाद यांनी दिले. आदेशानुसार शहजाद खान याची येरवडा, पुणे कारागृहात रवानगी करण्यात आली.
रामानंद पोलिस ठाण्याच्या हद्दीतील रहिवासी मयुर ऊर्फ विक्की अलोणे याच्यावर वेगवेगळ्या स्वरुपाचे ६ गुन्हे दाखल असून त्याच्यावर तीन वेळा प्रतिबंधात्मक कारवाई करण्यात आली आहे. रामानंद पोलिस ठाण्याचे पोलिस निरीक्षक शिल्पा पाटील यांनी त्याच्यावर एमपीडीएचा प्रस्ताव स्थानिक गुन्हे शाखेकडे पाठविला होता. तो प्रस्ताव पोलिस अधीक्षक एम. राजकुमार यांना पाठविण्यात आल्यानंतर त्यांनी एमपीडीए कारवाईची मंजुरी देऊन तो जिल्हाधिकाऱ्यांकडे सादर केला. त्याला स्थानबद्ध करण्याचे आदेश जिल्हाधिकारी आयुष प्रसाद यांनी दिले. आदेशानुसार मयुर ऊर्फ विक्की अलोणे याची कोल्हापूर मध्यवर्ती कारागृहात रवानगी करण्यात आली आहे. दोघं प्रस्तावाचे कामकाज स्थानिक गुन्हे शाखेचे वरिष्ट पोलिस निरीक्षक किसन नजन पाटील यांच्या मार्गदर्शनाखाली सहाय्यक फौजदार युनूस शेख इब्राहीम, पोहेकॉ सुनील दामोदरे, जयंत चौधरी, ईश्वर पाटील यांनी केले.
