जळगाव (प्रतिनिधी) परवान्यांसह कागदपत्र नसणे, गणवेश परिधान न करणे, प्रलंबित दंड यासह वेगवेगळ्या प्रकारे नियम भंग करणाऱ्या बेशिस्त रिक्षा चालकांविरुद्ध शनिवारी धडक कारवाईची मोहीम राबविण्यात आली. दिवसभरात शहर वाहतूक शाखेच्यावतीने ३० हून अधिक रिक्षांवर कारवाई करण्यात येऊन त्या वाहतूक शाखेत जमा करण्यात आल्या आहेत.
शहरातील वाहतुकीला शिस्त लागावी तसेच अपघात टाळण्यासाठी गेल्या आठवड्यात वाहतूक शाखेच्यावतीने वाहनधारकांवर कारवाई करण्यात आली. त्यानंतर आता रिक्षाचालकांविरुद्ध मोहीम हाती घेण्यात आली. जळगाव शहरात मागील काही वर्षात मोठ्या प्रमाणात रिक्षांची संख्या वाढली आहे. वाढत्या रिक्षांसह अनेक रिक्षा चालकांकडून कागदपत्र अपूर्ण ठेवणे, गणवेश न घालणे, ऑनलाईन दंड प्रलंबित ठेवणे, बॅचबिल्ला न बाळगणे अशा वेगवेगळ्या त्रुटी तपासणीवेळी आढळून येतात. तसेच रिक्षा चालविताना वाहतूक नियम धाब्यावर बसवून त्यांच्याकडून नियमांचा बोजवारा उडविला जात आहे.
शहरात विविध ठीकाणी कारवाई
शनिवारी पोलिस दलाने एकाचवेळी रेल्वे स्थानक परिसर, बसस्थानक, बेंडाळे चौक, प्रभाग चौक, इच्छादेवी चौक, नेहरु चौक, सुभाष चौक तसेच आकाशवाणी चौक व इतर भागातून रिक्षा तपसाणीची मोहीम सुरु केली. यात वाहतुकीचे नियमभंग केल्याचे आढळून आल्याने दिवसभरात ३० हून अधिक रिक्षांवर पोलिसांनी कारवाई करुन त्या वाहतूक शाखेत जमा केल्या.
उपविभागीय अधिकारी उरतले रस्त्यावर
रिक्षा जमा केल्यानंतर चालकांवर दंडात्मक कारवाई सुरू करण्यात आली. प्रत्येक रिक्षाचालकाने काय नियम मोडला, दंड थकीत आहे का, यानुसार दंडात्मक कारवाई करण्यात आली. शनिवारी कारवाईमध्ये पोलिसांचा मोठा फौजफाटा जागोजागी कारवाई करीत होता. उपविभागीय पोलिस अधिकारी संदीप गावित, वाहतूक शाखेचे पोलिस निरीक्षक पवन देसले हेदेखील रस्त्यावर उतरले व कारवाईबाबत सूचना देत होते.
