सोलापूर (वृत्तसंस्था) मोहोळ तालुक्यातील एका जिल्हा परिषद वस्ती शाळेतील आदर्श शिक्षक पुरस्कारप्राप्त शिक्षकाला आपल्याच विद्यार्थिनीवर अत्याचार केल्याप्रकरणी अटक करण्यात आली आहे. सातवीत शिकणाऱ्या अल्पवयीन विद्यार्थिनीवर अनेक दिवसांपासून लैंगिक अत्याचार केल्याचा त्याच्यावर आरोप आहे. शिक्षकाविरुद्ध मोहोळ पोलिस ठाण्यात बाललैंगिक अत्याचार कायद्यानुसार गुन्हा दाखल झाला आहे. त्यानंतर परराज्यात पळून जाण्याच्या बेतात असतानाच त्याला अटक करण्यात आली.
मोहोळ पोलिसांनी दिलेल्या माहितीनुसार, तालुक्यातील एका गावातील वस्ती शाळेत शिकणाऱ्या अल्पवयीन पीडित मुलीवर त्याच शाळेतील शिक्षकाने अत्याचार केल्याचा आरोप आहे. तो विद्यार्थिनीला वर्गात बोलवून घ्यायचा. माझ्याकडे तुझे प्रूफ आहेत, असे म्हणून ब्लॅकमेल करत असे. गेल्या दोन-तीन महिन्यांपासून सकाळी वर्गात लवकर आल्यानंतर तर कधी दुपारच्या जेवणाच्या सुटीत वर्गात बोलवून पीडित मुलीवर अत्याचार करायचा. हा प्रकार १५ एप्रिलला उघडकीस आला. त्यानंतर मुलीच्या पालकांनी तिला विश्वासात घेऊन माहिती घेतली असता सर्व प्रकार उघडकीस आला. २३ एप्रिलला पीडित मुलीच्या वडिलांनी मोहोळ पोलिस ठाण्यात फिर्याद दिली. त्यानंतर शिक्षकावर बाललैंगिक अत्याचार कायद्यानुसार गुन्हा दाखल करण्यात आला. त्याला अटकही करण्यात आली आहे.
