वाळूज महानगर (वृत्तसंस्था) माहेराहून पाच लाख रुपये आणत नसल्याच्या कारणावरून मारहाण करत पत्नीचा गळा दाबून खून केल्याची घटना रांजणगाव येथे शुक्रवारी (दि.१) सकाळी उघडकीस आली, खून करून पती स्वतः पोलीस ठाण्यात हजर झाला, सुनीता मदन बेडवाल (रा. वझर, जि. जालना, हम गणेशनगर, रांजणगाव शे.पुं., ता. गंगापूर, जि. छत्रपती संभाजीनगर) असे खून झालेल्या महिलेचे नाव आहे. याप्रकरणी पती मदन बाबूसिंग बेडवाल (३०), सासू रुखमबाई बाबूसिंग बेडवाल (५८), सासरा बाबूसिंग बेडवाल (६२), दीर रामेश्वर बाबूसिंग बेडवाल (२४) सर्व रा. गणेशनगर, रांजणगाव अशी अटक केलेल्या आरोपींची नावे आहेत.
सुनीता बेडवाल ही पती मदन बेडवाल, ४ वर्षीय मुलासह रांजणगाव, गणेशनगर येथे वास्तव्यास होती. मदन हा कंपनीत काम करून उदरनिर्वाह करतो. तर आई, वडीलही बाजूलाच राहतात. तसेच सुनीताची दुसरी बहीण संगीता बारवालसुद्धा गणेशनगर येथे पती, मुलासह राहते. दरम्यान, सुनीताला पती, सासू, सासरा, दीर हे सर्व दुचाकी व फ्रीजसाठी माहेराहून पैसे आण म्हणून नेहमी त्रास देत होते. ही गोष्ट तिने माहेरी भावाला सांगितल्यानंतर त्याने फ्रीज व दुचाकी घेऊन दिली. त्यानंतर चार ते पाच महिन्यांपासून ५ लाख रुपये माहेराहून घेऊन ये, असे म्हणून तिचा शारीरिक व मानसिक छळ सुरू केला. त्यानंतर तिने पुन्हा ही गोष्ट तिच्या भावास सांगितली. मात्र त्याची आर्थिक परिस्थिती चांगली नसल्याने मी मदत करू शकत नाही, असे मदन यास सांगितले होते. त्यामुळे पती हा ऑक्टोबर २०२३ मध्ये मुलगा आर्यन यास घेऊन कुठेतरी निघून गेला होता. त्यानंतर काही दिवसांनी पुन्हा घरी येत त्याने पैशाची मागणी केली. त्यामुळे भाऊ संजय महेर याने मदन यास समजावण्याचा प्रयत्न केला असता, त्यावेळी पैसे आण नाहीतर बहिणीला घेऊन जा, नाही तर मी मारून टाकीन, अशी धमकी दिली होती.
दरम्यान, शुक्रवारी पहाटेच्या सुमारास मदनने सुनीताचा गळा दाबून खून केला. घटनेनंतर सकाळी एमआयडीसी वाळूज पोलीस ठाण्यात हजर होत त्याने मी माझ्या पत्नीचा खून केल्याची माहिती पोलिसांना दिली. माहिती मिळताच घटनास्थळी दाखल झालेत. पोलिसांनी सुनीताला बेशुद्धावस्थेत रांजणगाव ग्रामपंचायतीच्या रुग्णवाहिकेतून शासकीय रुग्णालयात दाखल केले. दरम्यान, वैद्यकीय अधिकाऱ्यांनी तपासून मृत घोषित केले. याप्रकरणी सुनीताचा भाऊ संजय महेर (रा. लाखेगाव, ता. पैठण, जि. छत्रपती संभाजीनगर) यांनी दिलेल्या फिर्यादीवरून पती मदन बेडवाल, सासू रुखमबाई, सासरा बाबूसिंग, दीर रामेश्वर यांच्याविरुद्ध खुनाचा गुन्हा दाखल करण्यात आला आहे. पुढील तपास पोलीस निरीक्षक कृष्णचंद्रा शिंद यांच्या मार्गदर्शनाखाली पोउपनि सचिन पागोटे करीत आहेत.
