धरणगाव (प्रतिनिधी) एकशे सात वर्षांची उज्ज्वल परंपरा असलेल्या महाराष्ट्रातील नामवंत शतकोत्तरी पी.आर. हायस्कूलच्या दहावीच्या १९८९-९० च्या बॅचने गेल्या आठवड्यात स्नेहसंवर्धनाचे आयोजन करून एक दिवस शाळेत घालवला आणि आपल्या शालेय जीवनातील आठवणींना उजाळा दिला. तब्बल ३१ वर्षांनी जवळ जवळ ७५ माजी विद्यार्थी आणि विद्यार्थिनींनी प्रथमच एकत्र येऊन धरणगावात तीन दिवसीय स्नेहसंवर्धनाचे आयोजन केले होते.
या काळात त्यांनी धरणगाव परिसरातील आणि शाळेतील आठवणींना उजाळा दिला. यातील बहुतांश विद्यार्थी हे वेगवेगळ्या शहरात नोकरी, व्यवसायाच्या निमित्ताने स्थिरावले आहेत. उच्च पदांवर कार्यरत आहेत. काही नामांकित डॉक्टर्स, इंजिनियर्स आहेत तर महेश आहेर, लोकमतचे पत्रकार आर.डी. महाजन, सुरेंद्र सोनार हे धरणगावातीलच शाळेत शिक्षक म्हणून कार्यरत आहेत. तर दिपक आबा जाधव हे लिटल ब्लासम स्कूलचे चेअरमन आहेत. याप्रसंगी तत्कालीन मुख्याध्यापक व्ही.टी.गालापुरे, पी. एन. सोनार सर आणि व्ही. एन. गुजराथी यांचे आशीर्वाद घेऊन त्यांचा भावपूर्ण सत्कार करण्यात आला. आताचे मुख्याध्यापक डॉ.संजीवकुमार सोनवणे हे याच १९८९ बॅचला या शाळेत रूजू झाले होते. आणि आता ३१ वर्षानंतर याच बॅचच्या स्नेहसंवर्धनाच्या वेळी मुख्याध्यापक झालेत, शाळेला एक डॉक्टरेट, उच्च विद्याविभूषित आणि नावीण्याची ओढ असलेला मुख्याध्यापक लाभला असा अपूर्व योगायोग साधून या विद्यार्थ्यांनी डॉ. संजीवकुमार सोनवणे यांचा भावपूर्ण सत्कार केला.
तब्बल एकतीस वर्षानंतर शाळेच्या अद्ययावतीकरणाचे काम पाहून विद्यार्थ्यांनी आनंद व्यक्त केला. शाळेचे सुंदर आणि आधुनिक रूप पाहून विद्यार्थी पुन्हा एकदा शाळेच्या प्रेमात पडले. एकतीस वर्षापूर्वी ज्या वर्गात, ज्या बेंचवर बसून अभ्यासाचे कित्ते गिरवले तेथे बसले, ज्या क्रीडांगणावर खेळले, बागडले तेथे पुन्हा खेळून शालेय जीवनातला आनंद उपभोगला. शाळेशी बांधिलकी म्हणून या माजी विद्यार्थ्यांनी शाळेला स्मार्ट टिव्ही संच भेट म्हणून दिला. तो मुख्याध्यापक डॉ. सोनवणे यांनी स्वीकारला. भविष्यात दरवर्षी शाळेतील गरीब व होतकरू विद्यार्थ्यांसाठी भरीव योगदान देण्याची ग्वाही या विद्यार्थ्यांनी देऊन शाळेविषयीची आपली कृतज्ञता व्यक्त केली.
