धरणगाव (प्रतिनिधी) आगामी बाजार समिती,जि.प.व पं स. तसेच विविध स्थानिक संस्थांच्या निवडणुकीत जागेचा बरोबरीचा वाटा तसेच सन्मानपुर्वक वागणुक मिळाली तरच शिंदे गटाच्या शिवसेनेशी युती करा, अन्यथा स्वबळावर निवडणुक लढण्यासाठी सज्ज व्हा, असा कार्यकर्त्यांचा एकमुखी सूर साकरे येथील मेळाव्यात बघायला मिळाला.
नुकताच भाजपाचा तालुक्यातील मेळावा साकरे गावी संपन्न झाला. याप्रसंगी सन्मानपुर्वक वागणुक मिळाली तरच शिंदे गटाशी युती, अन्यथा स्वबळावर लढा, अशी एकमुखी मागणी कार्यकर्ते व नेत्यांच्या चर्चेत करण्यात आली. साळवा फाटा जवळील साकरे गावाजवळ भारतीय जनता पार्टीचा मार्केट कमिटी निवडणूक संदर्भात व बुथ सशक्तीकरण कार्यकर्ता मेळावा नुकताच संपन्न झाला. त्या प्रसंगी विविध स्थानिक संस्थेचा निवडणुका विषयी युती संदर्भात चर्चा करण्यात आली.
यावेळी तालुक्यातील बुथ प्रमुख, शक्तिकेंद्र प्रमुख, शेतकरी आघाडी, ओबीसी आघाडी, युवा मोर्चाचे सर्व कार्यकर्ते पदाधिकारिंचा मेळावा आयोजित करण्यात आलेला होता. याप्रसंगी मेळाव्यात जिल्हा उपाध्यक्ष पी.सी.आबा पाटील, जेष्ठ नेते सुभाष अण्णा पाटील, चंद्रशेखर दादा अत्तरदे, ओबीसी जिल्हाध्यक्ष संजयभाऊ महाजन, शिरिषआप्पा बयास, अँड. वसंतराव भोलाने, तालुकाध्यक्ष जिजाबराव पाटील, एस.आर. पाटील, एरंडोलचे माजी नगराध्यक्ष रविअण्णा महाजन, शहराध्यक्ष दिलीप महाजन यांच्यासह विविध मान्यवरांनी आपले विचार मांडून सविस्तरपणे मार्गदर्शन केले.
प्रारंभी तालुका अध्यक्ष जिजाबराव पाटील यांनी कार्यक्रमाची रूपरेषा मांडली व आगामी काळातील निवडणुकीच्या संदर्भात चर्चा करण्यात आली. या मेळाव्यात एरंडोल व धरणगाव तालुक्यातील ग्रामपंचायत सदस्य, मार्केट कमिटीचे माजी सदस्य, वि.का.सोसायटी सदस्य, शेतकी संघ सदस्य व सर्व कार्यकर्ते, पदाधिकारी उपस्थित होते. कार्यक्रमाचे सूत्रसंचालन सरचिटणीस कन्हैया रायपुरकर यांनी केले तर आभार विशाल पाटील यांनी मानले. कार्यक्रमासाठी नगरसेवक ललित येवले यांनी परिश्रम घेतले. प्रसंगी असंख्य भाजपचे कार्यकर्ते उपस्थित होते.
