अमळनेर (प्रतिनिधी) शहरातील कलागुरू मंगलकार्यालयासमोर मालवाहू पिकअपने दुचाकीला मागून धडक दिल्यामुळे एक ठार तर एक जण गंभीर जखमी झाला आहे. याबाबत अमळनेर पोलीस स्थानकात अज्ञात मालवाहू पिकअपवरील चालकाविरुद्ध गुन्हा दाखल करण्यात आला आहे. या अपघातात कार्तिक प्रवीण महाजन (वय २१ रा. माळीनगर संगमेश्वर मालेगाव) हा तरुण मयत झाला आहे.
या संदर्भात अधिक असे की, दि. १७ फेब्रुवारी रोजी कार्तिक प्रविण महाजन (वय २१ वर्षे रा.माळीनगर संगमेश्वर मालेगाव) हा त्याचा मित्र गौरव वाघ (रा.मालेगाव) असे त्याच्या ताब्यातील हिरो कंपनीची स्पेंल्डर मोटार सायकल क्र. (एमएच ४१ एपी ६४०१)हिने डबल सिट अमळनेर येथून धुळेमार्गे मालेगावला जात होते. दुपारी ३.१५ वाजेच्या सुमारास कलागुरू मंगलकार्यालयासमोर रोडवर एक चारचाकी पिकअप मालवाहू वाहन (नंबर माहित नाही) वाहनावरील अज्ञात चालकाने मोटार सायकलीस मागुन जोराची ठोस मारली. या अपघातात मोटार सायकलवरील चालक कार्तिक प्रविण महाजन यास डोक्यास गंभीर दुखापत होऊन तो जागीच मयत झाला. तर त्याचा मित्र गौरव वाघ हा रोडावर फेकला गेल्याने त्यास देखील चेहऱ्यावर, छातीवर तसेच पाठीवर मार लागुन दुखापती झाली आहे. या संदर्भात नंदकुमार पांडुरंग महाजन (वय ५८ सेवानिवृत्ती शिक्षक, रा. श्रीराम कॉलनी शिरुड नाका अमळनेर) यांच्या फिर्यादीवरून पिकअप मालवाहू वाहनावरील अज्ञात चालकाविरुद्ध गुन्हा दाखल करण्यात आला असून पुढील तपास पोहेकॉ चंद्रकांत पाटील हे करीत आहेत.
