नांदेड (वृत्तसंस्था) एका प्राध्यापकानं आपली पत्नी आणि सासरच्या मंडळींच्या त्रासाला कंटाळून आपल्या निवासस्थानी गळफास घेऊन आत्महत्या (professor commit suicide) केली आहे. मृत्यूपूर्वी त्यांनी आपल्या मुलाला उद्देशून भावनिक सुसाईड नोट (Suicide note) लिहिली आहे. या प्रकरणी पोलिसांनी पत्नीसह पाच जणांविरोधात गुन्हा दाखल (FIR lodged) केला आहे.
संदिपान खंदारे असं आत्महत्या करणाऱ्या ३७ वर्षीय प्राध्यापकाचं नाव आहे. ते उमरखेड तालुक्यातील ब्राह्मणगाव येथील तेजमल गांधी ज्युनिअर कॉलेजमध्ये प्राध्यापक म्हणून कार्यरत होते. पोलिसांनी दिलेल्या माहितीनुसार, मृत संदिपान यांचं २०१९ मध्ये उमरखेड तालुक्यातील कृष्णापूर येथील स्नेहल गायकवाड हिच्याशी लग्न झालं होतं. लग्न झाल्यानंतर काही दिवस आनंदात गेल्यानंतर, महिनाभराने स्नेहलचे आपल्या सासू-सासऱ्यांसोबत खटके उडू लागले. याच कारणातून आरोपी पत्नी स्नेहल आणि तिच्या नातेवाईकांनी मृत संदिपानशी अनेकदा वाद घालून त्यांना मारहाण केली आहे. आरोपींकडून होणाऱ्या सततच्या त्रासाला कंटाळून अखेर प्राध्यापक खंदारे यांनी १५ फेब्रुवारी रोजी आपल्या निवासस्थानात गळफास लावून आत्महत्या केली आहे. या घटनेची माहिती मिळताच पोलिसांनी घटनास्थळी धाव घेतली. यावेळी पोलिसांना एका रजिस्टरमध्ये सुसाईड नोट सापडली आहे. ही सुसाईड नोट संदिपान यांनी आपला मुलगा वेदांतला उद्देशून लिहिली आहे.
मुलाला उद्देशून लिहिली सुसाईड नोट
सुसाईडमध्ये त्यांनी म्हटलं की, ‘प्रिय वेदांत, तुझ्या आईने आणि तिच्या नातेवाईकांनी तुझ्या पप्पाला तुझ्यापासून हिरावलं आहे. माझ्या मृत्यूस तुझ्या आईसह पाचजण जबाबदार आहेत. यांना तू सोडू नको.’ यामध्ये त्यांनी आत्महत्येस जबाबदार असलेल्या लोकांची नावंही लिहिली आहेत. ही सुसाईड नोट समोर आल्यानंतर नांदेडातील भाग्यनगर पोलिसांनी मृत संदिपान यांची बहीण रंजना यादव यांच्या तक्रारीवरून पत्नी स्नेहल गायकवाड, सासू गोदावरी गायकवाड, सासरा आनंदराव गायकवाड यांच्यासह अन्य दोघांवर गुन्हे दाखल केले आहे. या घटनेचा पुढील तपास पोलीस करत आहेत.
