जळगाव (प्रतिनिधी) शहरातील तालुका पोलीस स्टेशनजवळ असलेल्या खदानीत एका महिलेने आज सकाळी साडेसात वाजेच्या सुमारास उडी मारुन आत्महत्येचा प्रयत्न केला. ती महिला पाणथळीवर पडल्याने बचावली. महिला जखमी झाली असून परिसरातील नागरिकांसह पोलीस कर्मचारी तसेच अग्निशमन दलाच्या कर्मचाऱ्यांनी शर्थीचे प्रयत्न करून महिलेचे प्राण वाचवले आहे.
याबाबत वृत्त असे की, जयश्री रवींद्र पाटील, वय ४५ रा. सुदत्त कॉलनी असे महिलेचे नाव आहे. जयश्री पाटील या सकाळी सात वाजेच्या सुमारास घराबाहेर पडल्या होत्या. त्यानंतर सकाळी ७.३० वाजेच्या सुमारास त्या तालुका पोलिस ठाण्याजवळील ६० फूट खोल खदानीजवळ आल्या. क्षणार्धात त्यांनी खदानीत उडी मारली. त्या घरंगळत खदानीत पडल्या. खदानीत पाणी साचलेले असून त्यावर पानथळ उगवलेली आहे. त्या काठाजवळील पाणथळीवर पडल्याने त्या बचावल्या. जयश्री पाटील यांना जबर मार लागलेला आहे. त्यांना उडी मारताना बघून नागरिक मदतीसाठी धावून आलेत. तालुका पोलिस ठाण्याचे अनिल फेगडे, बापू कोळी, धर्मेंद्र ठाकूर, भूषण सपकाळे हे घटनास्थळी आले. त्यांनी नागरिकांच्या मदतीने पाटील यांना खदानीतून बाहेर काढण्याचा प्रयत्न केला. पंरतु, खदानीतून वर चढणे शक्य नसल्याने पोलिसांनी अग्नीशमन दलाला पाचारण केले. तोपर्यंत पाटील या खदानीमध्ये बसून होत्या. अग्नीशमन दलाचे कर्मचारी, अस्वीजीत घोरपडे, तेजस जोशी, भारत बारी, अनिल पाटील यांच्यासह पोलिस कर्मचाऱ्यांनी सीडीच्या सहाय्याने जयश्री पाटील यांना शर्थीचे प्रयत्न करून खदानीबाहेर काढण्यात आले.
