अमळनेर (प्रतिनिधी) – नगर परिषदेत कार्यरत असलेल्या ताडेपुरा येथील योगेश आधार पवार (वय ३२) यांच्या आयडीबीआय बँक खात्यातून ५ जून रोजी सकाळी ११.३८ वाजता सायबर गुन्हेगारांनी कोणताही ओटीपी किंवा बँकेचा कॉल न येता दोन टप्प्यांत ९४ हजार ९९९ रुपये ९७ पैसे काढून घेतल्याचा धक्कादायक प्रकार उघडकीस आला आहे.
योगेश पवार यांच्या आयडीबीआय बँक खात्यातून पहिल्या व्यवहारात ५० हजार रुपये तर दुसऱ्या व्यवहारात ४४ हजार ९९९ रुपये ९७ पैसे असे एकूण ९४ हजार ९९९ रुपये ९७ पैसे कंभपती रमेश व अभिषेक नायक या व्यक्तींच्या नावे पाठवण्यात आले. या संपूर्ण प्रक्रियेदरम्यान पवार यांच्या मोबाइलवर कोणताही ओटीपी आला नाही, तसेच बँकेकडून कोणताही पुष्टीकरण कॉल ही आला नाही.
केवळ पैसे कपात झाल्याचे मॅसेज पाहिल्यानंतर त्यांच्या पायाखालची जमीनच सरकली. दरम्यान, फसवणूक झाल्याचे लक्षात आल्यानंतर पवार यांनी त्वरित त्यांचे मित्र गौतम बिऱ्हाडे, सतीश बिऱ्हाडे आणि अनंत संदानशिव यांना याबाबत माहिती दिली. अनंत संदानशिव यांनी प्रसंगावधान राखत तत्काळ सायबर क्राइमच्या राष्ट्रीय पोर्टलवर जाऊन ऑनलाइन तक्रार दाखल केली. त्यांनी व्यवहाराची वेळ, रक्कम, बँकेचा तपशील आदी माहिती पोर्टलवर नोंदवली. यामुळे तपासाला गती मिळण्याची शक्यता आहे. या घटनेची माहिती मिळताच अमळनेर पोलीस ठाण्याचे राहुल चव्हाण यांनीही तापसाला सुरुवात केली आहे.
बँकेला आयडीबीआय व्यवहार तपासण्याचे निर्देश देण्यात आले आहेत. सायबर तज्ज्ञांच्या मते, अशा प्रकारची फसवणूक सिम क्लोनिंग, मोबाइल हॅकिंग किंवा प्री-अप्रूव्ड ट्रांॉक्शनद्वारे होऊ शकते. तसेच, कोणताही ओटीपी न आल्याने बँकेच्या व्यवस्थेतही गंभीर त्रुटी असल्याचे संकेत मिळतात.
