अमळनेर (प्रतिनिधी) – बनावट मुद्रांक खरे म्हणून वापर करून शासनास फसवले म्हणून तिघांविरुद्ध अमळनेर पोलिसात गुन्हा दाखल करण्यात आला आहे.
अमळनेर तहसील कार्यालयात अव्वल कारकून अनिल परदेशी यांच्याकडे १२ जून २०२५ रोजी दुपारी १ वाजता धरणगाव तालुक्यातील गंगापुरी येथील वीरेंद्र राजेंद्र सोनवणे, चोपडा तालुक्यातील सत्रासेन येथील कविता पंडित भील, अमळगाव येथील राजेंद्र जगन्नाथ जोशी हे अंतुर्लीकर विवाह मंडळाच्या विवाह सत्यतेसाठी १०० रुपयांचे प्रतिज्ञापत्र ऑनलाईन नोंदणी करून शिक्का मारून स्वाक्षरी घेण्यासाठी आले होते. अनिल परदेशी यांनी ते प्रमाणित केले होते. तर, २० एप्रिल २०२६ रोजी अॅड. अभिजित बिऱ्हाडे यांनी कलर झेरॉक्सवर बेकायदेशीर प्रतिज्ञापत्र केल्याबद्दल पोलिसांत तक्रार केली होती. त्याची चौकशी नायब तहसीलदार ए. पी. कुलकर्णी यांच्यातर्फे करण्यात आली. चौकशीत तिघांना मूळ प्रतिज्ञापत्र सादर करण्याच्या सूचना दिल्या होत्या. मात्र, त्यांनी मूळ स्टॅम्प सादर केले नाही आणि खुलासाही सादर केला नाही. त्यामुळे या तिघांविरुद्ध गुन्हा दाखल करण्यासाठी अनिल परदेशी यांना प्राधिकृत केल्याने त्यांच्या फिर्यादीवरून गुन्हा दाखल करण्यात आला आहे
