भुसावळ प्रतिनिधी । भुसावळ तालुक्यातील कुऱ्हे पानाचे गावात एका तरुणाला मतदान न केल्याच्या कारणावरून लोखंडी दांडा डोक्यात टाकून गंभीर दुखापत केल्याची घटना शुक्रवारी १६ ऑगस्ट रोजी दुपारी अडीच वाजता घडली आहे. याप्रकरणी सायंकाळी ६.३० वाजता भुसावळ तालुका पोलीस ठाण्यात एकावर गुन्हा दाखल करण्यात आला आहे.
या संदर्भात अधिक माहिती अशी की, भुसावळ तालुक्यातील कुऱ्हे पानाचे या गावात किशोर जगन्नाथ पाटील वय-३५ हा तरुण वास्तव्याला आहे. शुक्रवारी १६ ऑगस्ट रोजी दुपारी अडीच वर्षाच्या सुमारास किशोर पाटील हा गावातील रस्त्याने जात असताना गावात राहणारा रामलाल गोविंदा बडगुजर याने मतदान मला का केले नाही, यावर किशोर पाटील म्हणाला की, मला कुणालाही मतदान करण्याचा अधिकार आहे, त्यामुळे तुम्ही मला बोलू शकत नाही” असे बोलला. याचा राग आल्याने रामलाल बडगुजर याने हातातील लोखंडी दांडा किशोर पाटील यांच्या डोक्यात टाकून गंभीर दुखापत केली. या घटनेबाबत सायंकाळी ६.३० वाजता भुसावळ तालुका पोलीस ठाण्यात फिर्याद देण्यात आली. त्यानुसार रामलाल गोविंदा बडगुजर यांच्यावर गुन्हा दाखल करण्यात आला आहे. पुढील तपास पोहेकॉ कैलास बाविस्कर करीत आहे.
