बीड (वृत्तसंस्था) वेडसर असलेल्या डॉक्टर मुलाने वडीलांच्या डोक्यात लोखंडी खलबत्या घालून त्यांचा खून केला. ही धक्कादायक घटना बीड शहरातील अंकुशनगर भागात मंगळवारी (दि.१८) रात्रीच्या सुमारास घडली. सुरेश काशीनाथ कुलकर्णी (७०, रा. साईपंढरी, अंकुशनगर बीड) असे मयताचे तर सुधीर कुलकर्णी असे संशयित आरोपी मुलाचे नाव आहे.
मयताची पत्नी सुरेखा सुरेश कुलकर्णी यांनी शिवाजीनगर पोलिसात दिलेल्या फिर्यादीत म्हटले आहे, पती कृषी विभागात नोकरीस होते, २००२ मध्ये सेवानिवृत्त झाले. त्यांच्या पेन्शनवर कुटुंबाचा उदनिर्वाह चालतो. मुलगा सुधीर कुलकर्णी हा अविवाहित असून २०१० मध्ये त्याचे बीएएमएसचे शिक्षण पूर्ण झालेले असून एम. डी.चे तीन वर्ष शिक्षण घेतले परंतू त्यात तो नापास झाला. तेव्हापासून तो वेडसरपणाने वागू लागला. त्याला खासगी रुग्णालयात प्रॅक्टीससाठी पाठवले. परंतू त्याने व्यवस्थित ड्युटी केली नाही. तो अधिकच वेडसर वागू लागला, म्हणून त्यावर उपचारासाठी सोलापूर, बीड, लातूर, बीड येथील वेगवेगळ्या डॉक्टरांकडे वेडसरपणावर उपचार घेतले. मात्र त्यामध्ये काहीही बदल झाला नाही. त्यास गोळ्या औषध सुरुच होते.
मागील तीन वर्षापासून तो अधिकच वेडसर वागू लागला, अंगावर कपडे न घालता गल्लीत फिरायचा. सर्वांना त्याच्यामुळे त्रास व्हायचा, तसेच वडीलांनाही तो कधीकधी मारहाण करायचा. अशातच मंगळवार, १८ जुलै रोजी रात्री घरात देवाची आरती केली. वडीलांनी त्यास आरती घेण्यास सांगितले, त्यावर त्याने मला कशाची आरती देतो, कापूर उदबत्ती लावतो असे म्हणत घरातील लोखंडी खलबत्यातील बत्याने डोक्यात मारले आणि घरातून निघून गेला. सुरेश कुलकर्णी हे डोक्यावर जोराचा मार लागल्याने खाली कोसळले. शेजारील नागरिकांनी त्यांना जिल्हा रुग्णालयात दाखल केले, मात्र त्यांचा मृत्यू झाला. याप्रकरणी मयताच्या पत्नी सुरेखा कुलकर्णी यांच्या फिर्यादीवरुन शिवाजीनगर पोलीसात मुलगा सुधीर कुलकर्णीवर गुन्हा दाखल करण्यात आला आहे. संशयित आरोपी सुधीर अटकेत असून अधिक तपास पोलीस करत आहेत.
