चाळीसगाव (प्रतिनिधी) चाळीसगाव तालुक्यातील मेहुणबारे येथील एकाचा धारदार शस्त्राने भोसकून एकाचा खून झाल्याची घटना घडली आहे. दरम्यान, बहिणीने प्रेमविवाह केल्याच्या संशयातून भावाने हा खून केल्याची माहिती समोर आली आहे. वामन खैरनार (गढरी) (वय ५२ रा. ४ गल्ली पाण्याच्या टाकीजवळ मेहुणबारे ह.मु. तिरपोळे), असे मयत व्यक्तीचे नाव आहे.
या संदर्भात दिपक दगा गढरी (वय- ४५ बंदा नोकरी रा. गटरी गल्ली जुनेगाव मेहुणबारे ता. चाळीसगाव) यांनी फिर्याद दिली आहे. फिर्यादीत गढरी यांनी म्हटले आहे की, त्यांचे मावसा वामन खैरनार (गढरी) हे त्यांच्या पत्नी लताबाई सोबत राहतात व शेतमजुरी करतात. त्यांना एक मुलगा जगदिश व एक मुलगी आहे. सुमारे ३ महिण्यापूर्वी मावसभाऊ जगदिश याने ते यापूर्वी राहत असलेल्या मेहुणबारे गावात घराच्या मागील बाजुस राहणारी अश्विनी राजेंद्र चव्हाण हिच्या सोबत प्रेमविवाह केल्याचे समजले. याचाच राग अश्विनी हिच्या परिवाराला होता. सदर प्रेमप्रकरणावरुन दोघं परिवारामध्ये वादविवाद होऊन भांडण झाले होते. तसेच ते अधुनमधून दगडू खैरनार यांच्यासह नातेवाईकांना दमबाजी करत होते.
आज दि. १६ डिसेंबर रोजी सुमारे दुपारी १ वाजेच्या सुमारास दगडु वामन खैरनार (गढरी) हे तिरपोळे येथून मेहणबारे येथे धुळे रोडवरील हायस्कूल समोर असलेल्या रेशन दुकाणातून रेशन घेवून बसस्टॅडकडे पायी जात होते. यावेळी धुळे रोडवरील दादा कोळी यांच्या घरासमोर प्रेमप्रकरणाचा राग धरून अश्विनीचा भाऊ सचिन राजेद्र चव्हाण याने मोटार सायकलवर येवून त्याच्या हातातील धारधार हत्यार ( धा-याने) दगडु खैरनार (गढरी) यांच्या मानेवर मागील बाजूने वार केल्याने ते जागीच मयत झालेत. दरम्यान, संशयित आरोपीच्या शोधार्थ स्थानिक पोलिसांसह एलसीबीचे पथक वेगवेगळ्या ठिकाणी रवाना झाले आहेत.
