जळगाव (प्रतिनिधी) जळगावातून अटक केलेल्या पीएफआय (PFI) या संघटनेचा खजिनदार अब्दुल हादी अब्दुल रौफ (Abdul Hadi Abdul Rauf) याच्या जालना येथील घराची शुक्रवारी एटीएसच्या पथकाने झाडाझडती घेतली. त्यात लॅपटॉपसह अन्य कागदपत्रे जप्त केल्याचे सूत्रांनी सांगितले. दरम्यान, पीएफआयच्या समर्थकांनी रेहमानगंज भागात निदर्शने करून अब्दुलच्या घराची झडती घेण्यास विरोध केल्याने पोलिसांना सौम्य लाठीमार केल्याचे कळते.
पीएफआय या संघटनेच्या जालन्यासह अन्य ठिकाणी एनआयए आणि एटीएसने छापेमारी केली होती. जालन्यातील पीएफआय या संघटनेचा सक्रिय पदाधिकारी अब्दुल मोमीन रौफला जळगाव येथे अटक केल्यावर दहा दिवसांची पोलीस कोठडी सुनावली आहे. जालन्यातील रहेमानगंज येथील अब्दुल रौफ मोमीन याच्या घराची तपासणी करण्यासाठी एटीएसच्या पथकातील काही अधिकारी हे दुपारी साडेतीन वाजेच्या सुमारास त्याला घेऊन हजर झाले होते. पोलीस अब्दुलला घेऊन चौकशीसाठी आल्याचे कळताच परिसरातील संघटनेचे पदाधिकारी मोठ्या संख्येने जमा झाले. त्यांनी यावेळी कारवाईला विरोध केला. अब्दुल रौफ मोमीन हा निर्दोष असून, त्याला सोडून द्यावे, अशा घोषणा देत होते. प्रथम पोलिसांनी या जमावाला शांत राहून आम्हांला आमचे काम करू द्या, असे सांगितले. परंतु जमाव शांत होत नसल्याचे लक्षात आल्यावर स्थानिक पोलिसांनी जमावाला पांगवण्यासाठी सौम्य लाठीमार केला.
