जळगाव (प्रतिनिधी) – नाश्त्याचे पैसे मागतो या कारणावरुन यश मोहन चव्हाण (वय १८, रा. नाथवाडा) या तरुणाला शिवीगाळ करीत त्याच्या डोक्यात स्टीलचा रॉड मारुन गंभीर जखमी केले. तसेच पोलिसात केस केली तर जीवेठार मारेल अशी धमकी दिली. ही घटना दि. १९ जुलै रोजी सायंकाळी सव्वाआठवाजेच्या सुमारास नाथवाडा परिसरात घडली. याप्रकरणी गणेश अरुण सुर्यवंशी (रा. नाथवाडा) याच्याविरुद्ध गुन्हा दाखल करण्यात आला आहे.
शहरातील नाथवाड्यात राहणारा यश चव्हाण याचे याच परिसरात नाश्त्याची दुकान आहे. त्यांच्याकडे संशयित गणेश सुर्यवंशी हा नाश्ता करण्यासाठी गेला असता त्याला यशचा चुलत भाऊ कुलदीप चव्हाण याने नाश्त्याचे पैसे मागितले. त्या कारणावरुन दि. १९ जुलै रोजी रात्री सव्वाआठ वाजेच्या सुमारास गणेश सुर्यवंशी याने कुलदीप याला मारहाण केली. यश हा त्याठिकाणी गेला असता, त्याला देखील शिवीगाळ करुन त्याच्या डोक्यात स्टीलचा रॉड मारुन जखमी केले.
पोलीस केस केल्यास जीवेठार मारेल
रॉड मारुन पळून जात असतांना संशयित गणेश सुर्यवंशी याने माझ्यावर पोलीस केस केली तर तुला जीवे मारुन टाकेल अशी धमकी देखील दिली. दरम्यान, यश चव्हाण याने दि. २० जुलै रोजी एमआयडीसी पोलिसात तक्रार दिली. त्यानुसार संशयित गणेश अरुण सुर्यवंशी (रा. नाथवाडा) याच्याविरुद्ध गुन्हा दाखल केला असून तपास पोहेकॉ पंकज पाटील हे करीत आहे.
