छत्रपती संभाजीनगर (वृत्तसंस्था) दोन जिवलग मित्रांचे मृतदेह मंगळवारी (दि. १८) सकाळी सात वाजेच्या सुमारास मुकुंदवाडी परिसरातील रेल्वे रुळावर आढळून आल्यानंतर प्रचंड खळबळ उडाली आहे. अनिल दादाराव आव्हाड (२७, रा. भारतनगर, रेल्वे पटरीजवळ) आणि विशाल देविदास दाभाडे (२०, रा विश्रांतीनगर, मुकुंदवाडी परिसर) अशी मयत मित्रांची नावे आहेत. दरम्यान, मयत मित्रांच्या नातेवाइकांनी आत्महत्या नव्हे तर दोघांचा घातपात झाला असल्याचा संशय व्यक्त केला.
मयत अनिल हा मजुरी तर विशाल दाभाडे हा एमआयटी महाविद्यालयात शिक्षण घेत होता. मयत दोघेही जिवलग मित्र होते. सोमवारी दुपारपासूनच दोघेही सोबत होते. रात्री नऊ वाजेच्या सुमारास अनिलने आईला फोन करून घरी जेवणासाठी काय केले, असे विचारले. त्यावेळी त्याच्या आईने दाळ-भात केला असून, तुला डबा आणून देते, असे सांगितले. त्यावेळी अनिलने मी मित्रासोबत असल्याचे सांगितले. त्यानंतर रात्री उशिरापर्यंत दोघांनी पार्टी करून मद्यपान केले होते.
दरम्यान, मुकुंदवाडी परिसरातील रेल्वे रुळावर दोन तरुणांचे मृतदेह पडून असल्याची सकाळी मिळाली. त्यानंतर पुंडलिकनगर पोलीस ठाण्याच्या निरीक्षक राजश्री आडे यांनी आपल्या पथकासह घटनास्थळी धाव घेऊन रक्ताच्या थारोळ्यात पडलेल्या दोन्ही तरुणांचे मृतदेह तपासणीसाठी घाटी रुग्णालयात दाखल केले. याप्रकरणी पुंडलिकनगर पोलीस ठाण्यात नोंद करण्यात आली आहे. याबाबतचे वृत्त पुण्य नगरीने दिले आहे.
